🔯বঙাইগাঁৱত দেশভক্তি দিৱস উদযাপন🔯

🔯বঙাইগাঁৱত দেশভক্তি দিৱস উদযাপন🔯

📝বঙাইগাঁওঃ ২৮ জুলাই: বঙাইগাঁও জিলা প্ৰশাসনৰ সহযোগত  আৰু বঙাইগাঁও জিলা তথ্য  আৰু জনসংযোগ বিষয়াৰ কাৰ্যালয়ৰ উদ্যোগত দেওবাৰে জিলাখনত চতুৰ্থ সংখ্যক দেশভক্তি দিৱস উদযাপন কৰা হয়। উল্লেখ্য যে অসম চৰকাৰৰ কেবিনেট বৈঠকৰ সিদ্ধান্তমৰ্মে ২০২১ চনৰ পৰা দেশভক্ত তৰুণৰাম ফুকনৰ মৃত্যু দিন ২৮ জুলাইত তথ্য আৰু জনসংযোগ বিভাগে ৰাজ্যিক তথা জিলা পৰ্য্যায়ত দেশভক্তি দিৱস উদযাপন কৰি আহিছে। এইবেলিও বঙাইগাঁৱত জিলা পৰ্য্যায়ত তথ্য আৰু জনসংযোগ বিভাগে বঙাইগাঁও জিলা আয়ুক্ত কাৰ্যালয়ৰ সভাকক্ষত দেশভক্তি দিৱস উদযাপন কৰে।অনুষ্ঠানত অতিৰিক্ত জিলা আয়ুক্ত সুজাতা গগৈয়ে মুখ্য অতিথি, জ্যেষ্ঠ সাংবাদিক ৰঞ্জিত কুমাৰ শৰ্মাই নিৰ্দিষ্ট বক্তা আৰু স্বাধীনতা সংগ্ৰামীৰ পৰিয়ালৰ সদস্য কল্যাণ দাস আৰু সহকাৰী আয়ুক্ত তথা বিদ্যালয়সমূহৰ ভাৰপ্ৰাপ্ত পৰিদৰ্শক মূৰ্চনা মালাকাৰে সন্মানীয় অতিথি হিচাপে উপস্থিত থাকে ৷ অনুষ্ঠানত নিৰ্দিষ্ট বক্তা ৰঞ্জিত কুমাৰ শৰ্মাই তেওঁৰ ভাষণত তৰুণৰাম ফুকনৰ জীৱন আৰু কৃতিত্বৰ ওপৰত আলোকপাত কৰে। সাংবাদিক শৰ্মাই বক্তব্যত উল্লেখ কৰে যে যদি তৰুণৰাম ফুকনৰ জীৱনৰ আধাৰত এখনি তথ্য চিত্ৰ বিভাগীয়ভাৱে নিৰ্মাণ কৰে তেনেহ'লে নতুন প্ৰজন্মই তেওঁৰ জীৱনৰ বিষয়ে দৃশ্য-শ্ৰাব্য মাধ্যমত জানিব পাৰিব যিটো তেওঁলোকৰ বাবে আকৰ্ষণীয় হ'ব। স্বাধীনতা সংগ্ৰামী ৰোহিত দাসৰ পুত্ৰ কল্যাণ দাসে বক্তব্যত স্বাধীনতা সংগ্ৰামত তৰুণৰাম ফুকনৰ ভূমিকাৰ ওপৰত আলোকপাত কৰে। ইপিনে মুখ্য অতিথিৰ ভাষণত অতিৰিক্ত জিলা আয়ুক্ত সুজাতা গগৈয়ে কয় যে তৰুণৰাম ফুকনৰ জীৱনৰ বিভিন্ন দিশক বিষয়বস্তু হিচাপে লৈ যি ৰচনা প্ৰতিযোগিতা এইবেলি অনুষ্ঠিত কৰা হৈছিল, সেই ৰচনা প্ৰতিযোগিতাই ছাত্ৰ-ছাত্ৰীসকলক এই মহান ব্যক্তিগৰাকীৰ প্ৰতি নিশ্চিতভাৱে আগ্ৰহান্বিত কৰি তুলিছে। যিজন স্বাধীনতা সংগ্ৰামী দেশভক্ত নামেৰে জনাজাত যিজন লোকে স্বাধীনতা সংগ্ৰামত নেতৃত্ব দিছিল, যিজন সুবক্তা আছিল আৰু সাহিত্য চৰ্চাও কৰিছিল ,সেইজন ব্যক্তিৰ জীৱনক লৈ আমি গৌৰৱান্বিত হোৱা উচিত বুলিও কয় মুখ্য অতিথি গগৈয়ে। 

সভাত জিলা পৰ্যায়ৰ ৰচনা প্ৰতিযোগিতাৰ পুৰস্কাৰসমূহো প্ৰদান কৰা হয়।ৰচনা প্ৰতিযোতগিতাৰ ক শাখাত দিশা নাথে প্ৰথম পুৰস্কাৰ, সঞ্চিতা পাৰিৱালে দ্বিতীয় পুৰস্কাৰ আৰু চৈয়দা সোনাক্ষী ৰেহমানে তৃতীয় পুৰস্কাৰ লাভ কৰে । আনহাতে খ শাখাত ভাৰ্গৱ ৰায়ে প্ৰথম পুৰস্কাৰ, নাভোলিনা শৰ্মাই দ্বিতীয় পুৰস্কাৰ আৰু জিমলী নাথে তৃতীয় পুৰস্কাৰ লাভ কৰে ৷ পুৰস্কাৰৰ ভিতৰত আছিল এখন ফুলাম গামোচা, এখন প্ৰমাণপত্ৰ আৰু এটা স্মাৰক। জিলা তথ্য আৰু জনসংযোগ বিষয়া বিনু ৰাণী ৰাজবংশীয়ে আঁত ধৰা দেশভক্তি দিৱসৰ আজিৰ অনুষ্ঠানত বিভিন্ন বিদ্যালয়ৰ ছাত্ৰ-ছাত্ৰী, প্ৰধান শিক্ষক, অধ্যক্ষ তথা অন্যান্য শিক্ষক, বটাঁ প্ৰাপকৰ অভিভাৱক, জ্যেষ্ঠ নাগৰিক আৰু সংবাদ মাধ্যমৰ লোক উপস্থিত আছিল।🔯