🔯কমতাপুৰ স্বায়ত্তশাসিত পৰিষদত কলিতা জনগোষ্ঠীৰ বাবে ৩০ শতাংশ আসন সংৰক্ষণকে ধৰি ছয়টা দাবী উত্থাপন🔯

🔯কমতাপুৰ স্বায়ত্তশাসিত পৰিষদত কলিতা জনগোষ্ঠীৰ বাবে ৩০ শতাংশ আসন সংৰক্ষণকে ধৰি ছয়টা দাবী উত্থাপন🔯 

মুখ্যমন্ত্ৰীলৈ জিলা আয়ুক্তৰ জৰিয়তে স্মাৰক পত্ৰ প্ৰেৰণ কলিতা জনগোষ্ঠী সন্মিলনৰ 

সকলোৰে সম- অধিকাৰ, সম- মৰ্যদা আৰু ভাতৃত্বভাবেৰেহে গঠন হ'ব এখন সৰ্বাংগ সুন্দৰ পৰিষদ

বঙাইগাঁওঃ ২৩ জুলাইঃ কমতাপুৰ স্বায়ত্তশাসিত পৰিষদত কলিতা জনগোষ্ঠীৰ বাবে ৩০ শতাংশ আসন সংৰক্ষণৰ দাবী জনাইছে সদৌ অসম কলিতা জনগোষ্ঠী সন্মিলনে ৷ ইয়াৰ বাবে প্ৰয়োজনবোধে পৰিষদখনৰ সমষ্টিৰ সংখ্যা বৃদ্ধি কৰা হওক, যাতে জনসংখ্যাৰ সমানুপাতিক ভিত্তিত সকলো জনগোষ্ঠীকে সামৰি এখন সর্বাংগসুুন্দৰ পৰিষদ গঠন কৰিব পৰা যায়। এই মন্তব্য কৰিছে সন্মিলনৰ ৰাজ্যিক সভাপতি ডঃ সোনেশ্বৰ কলিতাই ৷ মঙলবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত এই মন্তব্য কৰে ৷ উল্লেখ্য যে মঙলবাৰে গোৱালপাৰা, বঙাইগাঁও আৰু ধুবুৰী জিলা কলিতা জনগোষ্ঠী সন্মিলনীৰ তৰফৰ পৰা যৌথভাবে বঙাইগাঁও জিলা আয়ুক্তৰ জৰিয়তে আসমৰ মুখ্যমন্ত্ৰীলৈ কমতাপুৰ স্বায়ত্তশাসিত পৰিষদৰ সীমা নির্ধাৰণ আৰু কলিতা জনগোষ্ঠী লোকৰ ভূমিকা সন্দৰ্ভত এখন স্মাৰক পত্ৰ প্ৰেৰণ কৰে ৷ এই স্মাৰক পত্ৰত ছয়টাকৈ দাবী তথা চৰ্ত উত্থাপন কৰা হৈছে ৷ এই স্মাৰক পত্ৰ প্ৰদানৰ পিচত প্ৰেছ ক্লাবত সন্মিলনৰ তৰফৰ পৰা আয়োজন কৰে এখন সংবাদ মেল ৷ সংবাদ মেলত সন্মিলনৰ ৰাজ্যিক সভাপতি ডঃ সোনেশ্বৰ কলিতাই কয় যে কলিতাসকল সকলো দিশতে বঞ্চিত হৈ আহিছে ৷ এটা সময়ত বিএচি হৈছিল৷ কোনেও ভবা নাছিল যে বিএচিয়ে পিচত আজিৰ এই বিটিআৰৰ পৰ্যায় পাব বুলি ৷ আজি কমতাপুৰ স্বায়ত্তশাসিত পৰিষদ হৈছে আৰু এটা সময়ত কি ৰূপ লয় আজিয়ে আমি ক'ব নোৱাৰো ৷ ইতিমধ্যে আমাক বিটিআৰে এটা শিক্ষা দি থৈছে ৷ সেয়ে আমি আৰম্ভণিৰ পৰাই সজাগ হ'ব খুজিছো যাতে কমতাপুৰ স্বায়ত্তশাসিত পৰিষদত কলিতাসকলৰ যিখিনি সুবিধা তথা যি অস্তিত্ব সেইখিনি যাতে অদূৰ ভৱিষ্যতে পৰিষদখনে যি ৰূপ পালেও বৰ্তমানৰ দৰে অক্ষুন্ন থাকে ৷ সেয়ে কলিতা জনগোষ্ঠী সন্মিলনে আগতিয়াকৈ গোটেই বিষয়টো চৰকাৰক অৱগত কৰিব বিচাৰিছোঁ বুলি কয় ৷ সংবাদ মেলত মুখ্যমন্ত্ৰীলৈ প্ৰেৰণ কৰা স্মাৰক পত্ৰখনত উল্লেখ কৰা দাবী তথা চৰ্তসমূহো পাঠ কৰি দি কয় যে কমতাপুৰ স্বায়ত্তশাসিত পৰিষদ এলেকাত বৃহৎসংখ্যক কলিতা জনগোষ্ঠীৰ লোক বাস কৰে। এই ক্ষেত্ৰত আহি থকা দিনবোৰত কলিতা জনগোষ্ঠীৰ মানুহখিনিয়ে কিবা সমস্যাৰ মুখামুখি হ’ব নেকি, তাৰ বাবে শংকিত হৈ আছে ৷ 

বিশেষকৈ কমতাপুৰ স্বায়ত্তশাসিত পৰিষদ এলেকাত সন্নিবিষ্ট  হ'বলগীয়া বঙাইগাঁও, গোৱালপাৰা আৰু ধুবুৰী জিলা এলেকাৰ কলিতা জনগোষ্ঠীৰ লোকসকল শংকাত ভুগিছে ৷ গোৱালপাৰা জিলা কলিতা জনগোষ্ঠী সন্মিলনৰ সভাপতি ড° বিভূতি কলিতা আৰু সম্পাদক চৈতন্য দাস, ধুবুৰী জিলা কলিতা জনগোষ্ঠী সন্মিলনৰ সভাপতি জয়ন্ত কলিতা আৰু বঙাইগাঁও জিলা কলিতা জনগোষ্ঠী সন্মিলনৰ সভাপতি সত্য নাৰায়ণ কলিতা আৰু সম্পাদক নিখিল দাস স্বাক্ষৰিত স্মাৰক পত্রখনত  মুখ্যমন্ত্রী ড° হিমন্ত বিশ্ব শর্মাৰ সুদক্ষ নেতৃত্বত আৰু জনকল্যাণকামী কামৰ অংশ হিচাবে বৃহত্তৰ অসমৰ সৰু সৰু জনগোষ্ঠীবোৰৰ আশা -আকাংক্ষা আৰু সমস্যা নিবাৰণৰ হেতু স্ব-শাসনৰ ব্যৱস্থা কৰি যি কেবাখনো স্বায়ত্তশাসিত পৰিষদ গঠন কৰিছে ,তাৰে ভিতৰত কমতাপুৰ স্বায়ত্তশাসিত পৰিষদখনো অন্যতম বুলি অভিহিত কৰি ইয়াক স্বাগতম জনাইও পৰিষদখনত কলিতা জনগোষ্ঠীৰ লোকসকলৰ অস্তিত্ব আৰু সুবিধাসমূহ যাতে সুৰক্ষিত থাকে তাৰ বাবে দাবী তথা চৰ্ত উত্থাপন কৰিছে ৷ যিবোৰ আগতিয়াকৈ স্পষ্ট হোৱাটো বিচাৰিছে কলিতা জনগোষ্ঠী সন্মিলনে ৷ বিশেষকৈ কমতাপুৰ স্বায়ত্তশাসিত পৰিষদত মাতৃভাষা অসমীয়াক স্বীকৃতি দি কলিতা জনগোষ্ঠীৰ ছাত্র-ছাত্রীসকলে যাতে নিজ মাতৃভাষাৰ জৰিয়তে অধ্যয়ন কৰিব পাৰে তাৰ নিশ্চিতকৰণ কৰাৰ লগতে মহাবিদ্যালয়, বিশ্ববিদ্যালয়, মেডিকেল, ইঞ্জিনিয়াৰিং আদিত অধ্যয়নৰ বাবে সংৰক্ষণ (কোটা) ব্যৱস্থা শিথিল কৰি মেধা শক্তিক প্রাধান্য দিয়া, ব্যৱসায়-বাণিজ্য, ঠিকা-ঠুকুলি আদি বিষয়ত আদায় দিব লগা কৰ-কাটল যাতে সম হাৰত থাকে তাৰ ব্যৱস্থা কৰাটো বিচাৰিছে কলিতা জনগোষ্ঠী সন্মিলনে ৷ আনহাতে কলিতা জনগোষ্ঠীৰ লোকসকল সাধাৰণ শ্ৰেণীত পৰা হেতু কোটা নামৰ এটা অক্টোপাছে গ্রাস কৰি আছে বুলি উল্লেখ কৰি ইয়াৰ ফলত জীৱিকা, চৰকাৰী চাকৰি আদিৰ পৰা উপযুক্ত প্ৰাৰ্থী সততে বিমুখ হৈ আহিছে ৷ গতিকে এই পৰিষদত নতুন কর্ম সংস্থান- চাকৰি আদি মকৰলৰ ক্ষেত্ৰত মেধাশক্তিক প্রাধান্য দি নিয়োগৰ সুবিধা দিয়াৰ ব্যবস্থা কৰিবলৈ দাবী উত্থাপন কৰিছে ৷ সেইদৰে পৰিষদৰ এলেকাধীন কলিতা লোক সকলৰ বাবে ভূমি-সম্পত্তি সম্পৰ্কত ৰায়তী স্বত্ব আইন, ভূমি বন্ধকত থোৱা পৰম্পৰাগত গাঁৱলীয়া ব্যৱস্থা, দখলী স্বত্ব প্রচলিত মালিকাধীন আইন আদিৰ প্ৰযোজ্য, প্রয়োগ আদি অক্ষত অৱস্থাত থাকিব লাগিব। কোনো নতুন অসাংবিধানিক জনবিৰোধী আইন প্ৰস্তুত কৰি প্ৰতিবন্ধকতাৰ সৃষ্টি কৰি মৌলিক অধিকাৰ কাঢ়ি নিব নোৱাৰিব আৰু জাতি আছে, মাটি নাই ব্যৱস্থাৰ ওৰ পেলাব লাগিব ৷ ইয়াৰোপৰি কমতাপুৰ স্বায়ত্তশাসিত পৰিষদৰ অন্তৰ্গত প্ৰতিখন জিলাত কমেও এটাকৈ ভগদত্ত ভৱন (সমূহীয়া ভৱন) নিৰ্মাণ কৰা আৰু সংসদীয় গণতন্ত্র শাসন ব্যৱস্থা পৰিচালনা কৰাৰ ক্ষেত্ৰত পৰিষদখনত শাসনৰ ভাগিদাৰ হ'বৰ বাবে মুঠ অনুমোদিত পাৰিষদৰ সংখ্যাৰ ত্ৰিশ শতাংশ কেৱল কলিতা জনগোষ্ঠীৰ বাবে সংৰক্ষণৰ নিশ্চিতকৰণ কৰাৰ দাবী তথা চৰ্ত আৰোপ কৰিছে ৷ প্রয়োজনবোধে চৰকাৰৰ লগত যোগাযোগ কৰি পৰিষদখনৰ সমষ্টিৰ সংখ্যা চল্লিশটালৈ বৃদ্ধি কৰি যাতে জনসংখ্যাৰ সমানুপাতিক ভিত্তিত সকলো জনগোষ্ঠীকে সামৰি এখন সর্বাংগ সুন্দৰ পৰিষদ গঠন কৰিব পৰা যায় তাৰ ব্যৱস্থা গ্ৰহণ কৰিবলৈ মুখ্যমন্ত্ৰী তথা চৰকাৰক দাবী জনাইছে কলিকা জনগোষ্ঠী সন্মিলনে ৷ পিচত সমষ্টিৰ সংখ্যা বৃদ্ধি কৰাতকৈ প্ৰথমতে বৃদ্ধি কৰি পৰিষদখন গঠনৰো পোষকতা কৰে ৷ 

সংবাদ মেলত সন্মিলনৰ ৰাজ্যিক সভাপতিগৰাকীয়ে কয় যে কমতাপুৰ স্বায়ত্তশাসিত পৰিষদ এলেকাত ৩০ - পৰা ৪০ শতাংশ কোচ ৰাজবংশী লোক আছে ৷ সেয়ে এই লোকসকলেই কেৱল ৰাজনৈতিক অধিকাৰ ভোগ কৰাটো কেতিয়াও হ'ব নোৱাৰে ৷ সকলো ৰাজনৈতিক অধিকাৰ কেৱল তেওঁলোকে পাব আৰু আমি বঞ্চিত হৈ থাকিম, এইটো মানি লোৱা নহ'ব ৷ ইয়াত থকা কলিতাসকল, সূত্ৰধৰসকল, নাথ যোগীসকল বা কেওঁতসকল কেতিয়াও বঞ্চিত হ'ব নোৱাৰিব ৷ তেওঁলোকৰ কাৰণেও এটা নিৰ্দিষ্টকৈ আসন সংৰক্ষণ হ'ব লাগিব ৷ কোচ ৰাজবংশী সংগঠনসমূহে ৩০ টা সমষ্টি তেওঁলোকৰ কাৰণে, পাঁচটা জনজাতিসকলৰ কাৰণে আৰু পাঁচটা সকলোৰে কাৰণে মুকলি ৰাখি আসন সংৰক্ষণ কৰিব লাগে বুলি কৈ থকাত আমি বেয়া পাইছোঁ ৷ কাৰণ তেওঁলোকৰ কাৰণে ৩০ টা সমষ্টি থকাৰ পিচত যি পাঁচটা জনজাতিৰ বাবে থাকিব তাত আমি নাপাও ৷ আনহাতে সকলোৰে কাৰণে মুকলি থকা পাঁচটা সমষ্টি কোনে পাব সেইটো সকলোৱে জানে ৷ গতিকে কোচ ৰাজবংশীসকলৰ বাবে কমেও ৫০- ৫৫ শতাংশ সংৰক্ষণ থাকক, কলিতাৰ কাৰণে ৩০ শতাংশ বিচাৰিছো ৷ আমি দাবী কৰা মতে চৰকাৰে দিব পাৰিব নে নোৱাৰে নাজানো ৷ কাৰণ আন জাতি - জনগোষ্ঠীসকলেও যিহেতু বিচাৰিব ৷ কিন্তু এটা নিৰ্দিষ্টকৈ আসন সংৰক্ষণ হ'ব লাগে ৷ তেওঁ কয় যে যিটো অৰ্থত আজি চৰকাৰে ইয়াত স্বায়ত্তশাসিত পৰিষদ দিব বিচাৰিছে সেই অনুসৰি কেৱল কোচ ৰাজবংশীসকলেই পীড়িত নহয়, কলিতাসকলো পীড়িত ৷ যিটো জনগোষ্ঠীয়ে আমাৰ মাটিৰ অধিকাৰটো কাঢ়ি নিছে কেৱল কোচ ৰাজবংশীৰে নিয়া নাই ৷ কলিতা, সূত্ৰধৰ, নাথ যোগী আৰু কেওঁতৰো নিছে ৷ গতিকে সকলোৰে মাটিৰ অধিকাৰটো সুৰক্ষিত হ'ব লাগিব, সম-মৰ্য্যদা,  সম-অধিকাৰ আৰু ভাতৃত্বভাব আমাক লাগিব ৷ তেতিয়াহে সকলোৱে মিলি এখন সর্বাংগ সুন্দৰ কমতাপুৰ স্বায়ত্তশাসিত পৰিষদ গঠন হ'ব বুলিও কয় ৷ উল্লেখ্য যে সংবাদ মেল আৰু জিলা আয়ুক্তক স্মাৰক পত্ৰ প্ৰদান কাৰ্যসূচীত তিনিওখন জিলা সমিতিৰ বিষয়ববীয়াসকলৰ লগতে বঙাইগাঁও জিলা কলিতা ছাত্ৰ সন্থাৰ সভাপতি নীলমণি কলিতা আদিও উপস্থিত আছিল ৷