🔯বঙাইগাঁৱত অসম গণ পৰিষদৰ সভাপতি তথা মন্ত্ৰী অতুল বৰা🔯

🔯বঙাইগাঁৱত অসম গণ পৰিষদৰ সভাপতি তথা মন্ত্ৰী অতুল বৰা🔯

উপ নিৰ্বাচনতো দলীয় প্ৰাৰ্থীয়ে জয়লাভ কৰিব 

ফনীভূষণ চৌধুৰীৰ বিকল্প বিচাৰি উলিওৱাত অসুবিধা হোৱা নাই 

অগপত কোনো বিসম্বাদ নাই

২০২৬ ৰ নিৰ্বাচনত বিজেপিৰে মিত্ৰতা সন্দৰ্ভত এতিয়াই ক'ব নোৱাৰি,সময় আছে 

📝বঙাইগাওঃ ৫ আগষ্ট : অসম গণ পৰিষদৰ সভাপতি তথা ৰাজ্য চৰকাৰৰ মন্ত্ৰী অতুল বৰাই সোমবাৰে অগপৰ বঙাইগাঁও জিলা কাৰ্যালয়ত উপস্থিত হৈ এখন দলীয় সভাত অংশগ্ৰহণ কৰাৰ লগতে দলীয় সতীৰ্থসকলৰ সৈতে দলীয় বিভিন্ন বিষয়ত বাৰ্তালাপ তথা মত বিনিময় কৰে । সভাত সভাপতি বৰাই সমাগত পঞ্চায়ত নিৰ্বাচন তথা বঙাইগাঁও বিধানসভা সমষ্টিৰ বাবে হ'বলগীয়া আগন্তুক উপ-নিৰ্বাচনত দলৰ বিজয় ধ্বজা ধৰি ৰাখিবৰ বাবে যাৱতীয় সাংগঠনিক কাম-কাজ আগবঢ়াই নিবলৈ দলীয় সতীৰ্থসকলক আহ্বান জনায় ৷ লগতে সভাত আঞ্চলিকতাবাদৰ ভেটি মজবুত কৰি বঙাইগাঁও বিধানসভা সমষ্টিবাসীয়ে অগপৰ জ্যেষ্ঠ নেতা তথা সমষ্টিটোৰ প্ৰাক্তন বিধায়ক ফণীভূষণ চৌধুৰীৰ এগৰাকী যোগ্য উত্তৰসুৰী পুনৰ নিৰ্বাচিত কৰিবলৈ সক্ষম হ’ব বুলিও তেখেতে আশা ব্যক্ত কৰে ৷ সভাত অগপৰ কেন্দ্ৰীয় সমিতিৰ উপ-সভাপতি কৰ্ণমোহন ৰায়, সাধাৰণ সম্পাদকদ্বয় ভূপেন ৰায় আৰু ধৰ্মেশ্বৰ ৰায়, বঙাইগাঁও বিধানসভা সমষ্টি সমিতিৰ সভাপতি বিজয় সিংহ , উপ পৌৰপতি তথা দলীয় নেতা শৈলেন্দ্ৰ সৰকাৰ প্ৰমুখ্যে অন্যান্য বিষয়ববীয়া তথা দলটোৰ ভাতৃ -ভগ্নী সমিতিৰ কৰ্মকৰ্তাসকল সভাত উপস্থিত থাকে। 

ইপিনে সভাৰ শেষত দলটোৰ সভাপতি তথা মন্ত্রী অতুল বৰাই সংবাদ মাধ্যমৰ প্রতিনিধি সকলৰ সৈতে হোৱা বার্তালাপত কয় যে ' উপনির্বাচন সমাগম ৷ বঙাইগাঁও সমষ্টিৰ লগতে আৰু অসমৰ চাৰিটা সমষ্টিৰ বিধায়ক সকল যিহেতু লোক সভালৈ নির্বাচিত হৈছে, সেয়ে এই সমষ্টিকেইটাত উপ নির্বাচন অনুষ্ঠিত হ’ব ৷ বঙাইগাঁও সমষ্টিটো দীৰ্ঘদিন ধৰি অগপৰ দখলত আছে আৰু ১৯৮৫ চনৰ পৰা ধাৰাবাহিকভাৱে ফনীভুষণ চৌধুৰীয়ে বিজয়ধ্বজা উৰুৱাবলৈ সক্ষম হৈছিল ৷ বঙাইগাঁও অসম গণ পৰিষদৰ দুৰ্গ ৷ সভাত দলৰ কৰ্মীসকলক লগ পালো ৷ এইবাৰৰ উপনির্বাচনতো দলটোৰ ফলাফল অবিশ্বাস্যভাৱে ভাল হ’ব ৷ তেওঁ প্ৰাক্তন বিধায়ক ফনীভূষণ চৌধুৰীৰ বিকল্প বিচাৰি উলিওৱাত অসুবিধা হোৱা নাই বুলি কৈ এতিয়ালৈকে এজনো ব্যক্তিয়ে প্ৰাৰ্থীত্বৰ বাবে আবেদন কৰা নাই বুলিও কয় ৷ ইপিনে অগপ দলত বিসম্বাদ সম্পর্কে সোধা এক প্রশ্নৰ উত্তৰত আঞ্চলিক দলটোৰ ৰাজ্যিক সভাপতি বৰাই কয় যে আমাৰ মাজত কোনো বিসম্বাদ নাই ৷ আমি সকলো একগোট ৷ লগতে অগপক ৰাজ্যখনৰ ভিতৰতে একমাত্ৰ সংগবদ্ধ আৰু ঐক্যবদ্ধ দল বুলি কৈ আজিৰ তাৰিখত এইটোৱে দলটোৰ সম্পদ বুলি কয় ৷ লগতে বঙাইগাঁৱত ভালেসংখ্যক ভোটৰ ব্যৱধানত  দলৰ প্ৰাৰ্থীগৰাকী জয়লাভ কৰিব বুলিও তেওঁ কয় ৷

আনহাতে ২০২৬ চনত বিজেপিৰে সৈতে দলটোৰ মিত্ৰতা সন্দৰ্ভত সভাপতি বৰাই কয় যে এতিয়াই ক'ব নোৱাৰি ৷ সময় আছে ৷ কাৰণ প্ৰথমে ৯৯ চনৰ শেষৰ ফালে বিজেপিৰে মিত্ৰতা হৈছিল ৷ তাৰ পিচত মিত্ৰতা ভংগ হৈছিল আৰু মিত্ৰতা হৈছে ৷ বিজেপি অগপৰ পুৰণি মিত্ৰ ৷ গতিকে আমি ২০১৬ চনত মিত্ৰতা কৰিছিলো ৷ আকৌ ২০২১ চনৰ নিৰ্বাচনৰ আগে আগে বহি কথা বতৰা পাতিছো ৷ গতিকে ইমান আগতিয়াকৈ কেনেকৈ ২০২৬ ৰ মিত্ৰতা সন্দৰ্ভত কম ? আনহাতে ইউপিপিএলৰ সৈতে বিটিআৰৰ নিৰ্বাচনত বিজেপিৰ মিত্ৰতা নেথাকিব বুলি মুখ্যমন্ত্ৰীয়ে কৰা মন্তব্য সন্দৰ্ভত অগপৰ সভাপতি বৰাই সেই সন্দৰ্ভত বিতংকৈ একো ক'ব নোৱাৰিব বুলিহে মন্তব্য কৰে ৷🔯