🔯বঙাইগাঁৱত লোক কল্যাণ দিৱস পালন🔯

🔯বঙাইগাঁৱত লোক কল্যাণ দিৱস পালন🔯

📝বঙাইগাঁওঃ ৫ আগষ্ট: সমগ্ৰ ৰাজ্যৰ লগতে বঙাইগাঁও জিলাতো সোমবাৰে "লোক কল্যাণ দিৱস"পালন কৰা হয়। বঙাইগাঁও জিলা প্ৰশাসনৰ উদ্যোগত পালন কৰা "লোক কল্যাণ দিৱস"উপলক্ষে জিলা আয়ুক্ত কাৰ্যালয়ৰ সভাকক্ষত এখন সভা অনুষ্ঠিত হয়। সভাত অভয়াপুৰী মহাবিদ্যালয়ৰ প্ৰাক্তন অধ্যাপিকা ডঃমৰমী বৰঠাকুৰ তালুকদাৰে সমল ব্যক্তি হিচাপে উপস্থিত থাকে। ভাষণ প্ৰসংগত তেওঁ কয় যে লোকপ্ৰিয় গোপীনাথ বৰদলৈ এনে এজন ব্যক্তি যাৰ ব্যক্তিত্বই গোটেই জাতিটোকেই সমৃদ্ধ কৰি গৈছে। এনে এজন ব্যক্তিৰ মৃত্যু দিৱসটো লোক কল্যাণ দিৱস হিচাপে পাতিবলৈ চৰকাৰে যি উদ্যোগ ল'লে সেয়া নিশ্চয় প্ৰশংসনীয়। তেওঁ স্বাধীনতা আন্দোলনৰ সময়ত জাতীয় কংগ্ৰেছত যোগদান কৰি দেশৰ স্বাধীনতাৰ হকে যুঁজিছিল আৰু কাৰাবৰণো কৰিবলগীয়া হৈছিল। তেওঁ কাৰাগাৰত থকা সময়খিনিও সদ্ব্যৱহাৰ কৰি সাহিত্য সৃষ্টি কৰিছিল বুলি কয় ডঃমৰমী বৰঠাকুৰ তালুকদাৰে।তেওঁ আৰু কয় যে ভূমিৰ অধিকাৰৰ বাবে গোপীনাথ বৰদলৈয়ে আইন কৰি থৈ গৈছে, নহ'লে আজি খিলঞ্জীয়াৰ ভূমিৰ অধিকাৰ নাথাকিলহেঁতেন। তেওঁৰ উদ্যোগত অসমত বিশ্ববিদ্যালয় হ'ল, চিকিৎসা মহাবিদ্যালয় হ'ল, আদালত হ'ল। 

গোপীনাথ বৰদলৈৰ বিষয়ে বৰঠাকুৰ তালুকদাৰে আৰু কয় যে তেওঁ দুখীয়া মানুহৰ কল্যাণৰ বাবে কিছুমান কাম কৰিছিল ৷ উদাহৰণ স্বৰূপে তেওঁ মুখ্যমন্ত্ৰী হৈ থাকোঁতে বিধায়কসকলৰ দৰমহাৰ পৰা কিছু টকা কাটি দুখীয়া লোকৰ মাজত বিতৰণ কৰিছিল। ইপিনে লোক কল্যাণ দিৱসত দক্ষ বিষয়া-কৰ্মচাৰীক বঁটা প্ৰদান কৰি চৰকাৰে বিষয়া-কৰ্মচাৰীক কাম কৰিবলৈ উৎসাহিত কৰিছে বুলি মন্তব্য কৰি এই ব্যৱস্থা দীৰ্ঘস্থায়ী হোৱাৰো তেওঁ কামনা কৰে ৷ বঙাইগাঁও জিলাৰ জিলা উন্নয়ন আয়ুক্ত ধ্ৰুৱজ্যোতি দাসে আদৰণি ভাষণ ৰখা সভাত বিগত বছৰৰ বঙাইগাঁও জিলাৰ লোক কল্যাণ দিৱসত বঁটা প্ৰাপক অকণ ৰাভায়ো বক্তব্য ৰাখে ৷ অতিৰিক্ত জিলা আয়ুক্ত সুজাতা গগৈয়ে আঁত ধৰা  সভাৰ অনুষ্ঠানত জিলা প্ৰশাসনৰ বিষয়া-কৰ্মচাৰীৰ লগতে জিলাখনৰ বিভিন্ন বিভাগৰ বিষয়া-কৰ্মচাৰীও উপস্থিত থাকে।🔯