🔯আক্ৰাছুৰ একত্ৰীকৰণঃ অভয়াপুৰীত প্ৰাক্তন সভাপতি বিশ্বজিৎ ৰায়ৰ সভাপতিত্বত সাধাৰণ সভা🔯

🔯আক্ৰাছুৰ একত্ৰীকৰণঃ অভয়াপুৰীত প্ৰাক্তন সভাপতি বিশ্বজিৎ ৰায়ৰ সভাপতিত্বত সাধাৰণ সভা🔯  

বহুধাবিভক্ত সংগঠনটোক অতিশীঘ্ৰে একত্ৰীকৰণ কৰাৰ বাবে ১৭ জনীয়া আহ্বায়ক সমিতি গঠন

📝বঙাইগাঁওঃ ১৮ আগষ্ট: কোচ ৰাজবংশী জনগোষ্ঠীৰ অৰাজনৈতিক ছাত্ৰ সংগঠন সদৌ কোচ ৰাজবংশী ছাত্ৰ সন্থা, চমুকৈ আক্ৰাছু টুকুৰাটুকুৰ হৈ কেবাটাও ভাগত বিভক্ত হৈ জনগোষ্ঠীটোৰ হৈ মাত মতাৰ বিপৰীতে নিজৰ মাজতে অৰিয়াঅৰি কৰি থকা কাৰ্যত আক্ৰাছুৰ বহু সংখ্যক প্ৰাক্তন নেত-কৰ্মী আৰু বৌদ্ধিক সমাজ চিন্তিত হৈ পৰিছে ৷ আক্ৰাছুক মুকলিকৈ একত্ৰীকৰণৰ আহ্বান জনোৱাৰ পিছতো কোনো এটা গোটে কাণসাৰ নিদি ক্ষমতা কেন্দ্ৰিক ৰাজনীতিত জড়িত হৈ থকাহে দেখা গৈছে ৷ এনেবোৰ কৰ্মকাণ্ডৰ বাবে কোচ ৰাজবংশী সমাজ আজি লজ্বানত হৈছে ৷ কোচ ৰাজবংশী সচেতন নাগৰিক মঞ্চ নামৰ এটা সামাজিক গোটে কিছুদিন আগতে আক্ৰাছুক একত্ৰীকৰণ হৈ জাতিৰ সেৱাৰ বাবে মনোনিৱেশ কৰিবলৈ আহ্বান জনোৱাৰ পিছত আক্ৰাছুৰ প্ৰাক্তন সাধাৰণ সম্পাদক হৰমোহন মেধিৰ নেতৃত্বত আক্ৰাছুৰ একত্ৰীকৰণৰ বিষয় লৈ ধুবুৰী জিলাৰ মহামায়া স্নানঘাট মন্দিৰৰ সভাকক্ষত এক সভা অনুষ্ঠিত কৰাৰ পিছত দেওবাৰে বঙাইগাঁও জিলাৰ অভয়াপুৰীস্থ চিলাৰায় ভৱনত আক্ৰাছুৰ প্ৰাক্তন সভাপতি বিশ্বজিৎ ৰায়ৰ সভাপতিত্বত এখন সাধাৰণ সভা অনুষ্ঠিত হয় ৷ কোচ ৰাজবংশী যুৱ-ছাত্ৰ সন্মিলনীৰ নেতা ধনজিৎ ৰায় আৰু গৌৰাংগ ৰায়ৰ উদ্যোগত অনুষ্ঠিত সাধাৰণ সভাত ধুবুৰী জিলাৰ হালাকুৰা, বালাজান, বিলাসীপাৰা, চিৰাং জিলাৰ চিদলী, সুন্দৰী, বিজনী, গোৱালপাৰা জিলাৰ টিকিৰকিল্লা, দাৰকা, বঙাইগাওঁ জিলাৰ অভয়াপুৰী, সৃজনগ্ৰাম, সিদলসতী, বৰপেটা জিলাৰ প্ৰতিনিধি উপস্থিত থাকে ৷ 

ধনজিৎ ৰায়ে আঁতধৰা সভাত কেইবাটাও প্ৰস্তাৱ গ্ৰহণ কৰে৷ মূলত আক্ৰাছুক অতিশীঘ্ৰে একত্ৰীকৰণ কৰাৰ বাবে ১৭ জনীয়া এখন আহ্বায়ক সমিতি গঠন কৰা হয়। সেইদৰে কোচ ৰাজবংশী জনগোষ্ঠীক কেন্দ্ৰীয় আৰু অসম চৰকাৰে জনজাতিকৰণ নকৰা বাবে গৰিহণা দি অতিশীঘ্ৰে জনজাতিকৰণৰ মৰ্যাদা প্ৰদান কৰিৱলৈ আহ্বান জনায়৷ সাধাৰণ সভাই বহুধাবিভক্ত আক্ৰাছু যদি অতিশীঘ্ৰে একত্ৰিত নহয় তেতিয়াহে জাতীয় সংগ্ৰামখন আগুৱাই নিয়াৰ স্বাৰ্থত অক্টোৱৰ নতুবা নবেম্বৰৰ মাহত জাতীয় স্বাৰ্থত আন এক নতুন সংগঠন নতুবা আক্ৰাছুৰ জিলা, আঞ্চলিক আৰু তৃণমূল নেতা- কৰ্মীকলৈ আক্ৰাছুক শক্তিশালী ৰূপত গঠন কৰিব বুলি প্ৰস্তাৱ গ্ৰহণ কৰে । সভাত অতুল বৰ্মন নেতৃত্বাধীন আক্ৰাছুৰ কেন্দ্ৰীয় সাধাৰণ সম্পাদক ভূপেন ৰায় উপস্থিত থাকি আক্ৰাছুৰ একত্ৰীকৰণত পূৰ্ণ সমৰ্থন জনাই বক্তব্য ৰাখে বুলি মুখ্য আহ্বায়ক বিশ্বজিৎ ৰায়ে এক প্ৰেছ বিবৃতিযোগে জানিবলৈ দিছে ৷