🔯বঙাইগাঁও জিলা কংগ্রেছ কার্যালয়ত ন কংগ্রেছী ব্ৰজেনজিৎ সিংহক আদৰণি- সম্বর্ধনা🔯

🔯বঙাইগাঁও জিলা কংগ্রেছ কার্যালয়ত ন কংগ্রেছী  ব্ৰজেনজিৎ সিংহক আদৰণি- সম্বর্ধনা🔯

অগপ দলে অসম চুক্তিৰ বিপৰীত কামহে কৰি আছে 

কংগ্ৰেছ দলত যোগদান কৰাৰ পিচতো জাতীয়তাবাদী সত্বাটো শেষ হৈ যোৱা নাই 

#বঙাইগাঁওঃ১৯ আগষ্ট : ভাৰতীয় জাতীয় কংগ্রেছত যোগদান কৰা অৱসৰপ্ৰাপ্ত আৰক্ষী বিষয়া ব্ৰজেনজিৎ সিংহক সোমবাৰে বঙাইগাঁও জিলা কংগ্রেছ কার্যালয় ৰাজীৱ ভৱনত উষ্ম আদৰণি তথা সম্বর্ধনা জনোৱা হয় ৷ উল্লেখ্য যে ন আগষ্টত গুৱাহাটী ৰাজীৱ ভৱনত আনুষ্ঠানিকভাৱে কংগ্ৰেছ দলত যোগদান কৰাৰ পিছত প্ৰথমবাৰৰ বাবে সোমবাৰে নকংগ্ৰেছী ব্ৰজেনজিৎ সিংহই বঙাইগাঁও ৰাজীৱ ভৱনত উপস্থিত হয় ৷ এই উপলক্ষে জিলা কংগ্ৰেছ কমিটিৰ উদ্যোগত তথা ডাংতল ব্লক কংগ্ৰেছ কমিটি আৰু বঙাইগাঁও পৌৰসভা ব্লক কমিটিৰ সহযোগত অনুষ্ঠিত সম্বৰ্ধনা অনুষ্ঠানত কংগ্রেছ দলত যোগদান কৰা ব্ৰজেনজিৎ সিংহক জিলা কাৰ্যালয়ত আদৰণি জনাই সম্বৰ্ধনা জনায় ৷ জিলা কংগ্ৰেছৰ সভাপতি আবুল কাশেমৰ সভাপতিত্বত অনুষ্ঠিত অনুষ্ঠানত দক্ষিণ অভয়াপুৰী বিধানসভা সমষ্টিৰ বিধায়ক প্ৰদীপ সৰকাৰৰ লগতে জিলা আৰু ব্লক কংগ্ৰেছৰ বিষয়ববীয়া আদি উপস্থিত আছিল ৷ 

ইপিনে বঙাইগাঁও জিলা কংগ্রেছৰ ফালৰ পৰা সম্বর্ধনা গ্রহণ কৰি ব্ৰজেনজিৎ সিংহই কয় যে 'ভাৰতবর্ষ এখন ধর্মনিৰপেক্ষ গণতান্ত্রিক ৰাষ্ট্র ৷ ভাৰতৰ গণতান্ত্রিক তথা ধর্মনিৰপেক্ষ ব্যৱস্থাটোৰ প্রতি এটা ভাবুকি আহিছে ৷ গতিকে ইয়াক প্রতিহত কৰিবৰ কাৰণে ভাৰতবর্ষৰ ৰাইজে চেষ্টা চলাই আছে, সংগ্রাম কৰি আহিছে ৷ অসমৰ ৰাইজেও কৰি আছে ৷ ইয়াত কংগ্রেছ দলে নেতৃত্ব দি আছে ৷ ভাৰতৰ গণতান্ত্রিক তথা ধর্মনিৰপেক্ষ ব্যৱস্থাটোক শক্তিশালী কৰাৰ স্বার্থত যিহেতুকে কংগ্রেছ দলে নেতৃত্ব দি আহিছে, সেয়ে কংগ্রেছ দললৈ আহিছো ৷' আনহাতে সমাগত উপ নির্বাচনৰ প্রাক মুহুর্তত কংগ্রেছ দলত যোগদান কৰা সম্পর্কত সাংবাদিকে সোধা এক প্রশ্নৰ উত্তৰ সিংহই কয় যে- মই কোনো নির্বাচনত প্রতিদ্বন্দ্বিতা কৰিবলৈ অহা নাই ৷ দললৈ যোগ দিয়াৰ সময়ত পূর্বচৰ্ত আৰোপ কৰিও দললৈ অহা নাই ৷ গতিকে অনাগত দিনত দলে মোক যি দায়িত্ব দিয়ে, সেয়া নিষ্ঠা সহকাৰে পালন কৰি যাম ৷ ইপিনে বঙাইগাঁও সমষ্টিত দীর্ঘদিন ধৰি অগপৰ জ্যেষ্ঠ নেতা ফনীভুষণ চৌধুৰীয়ে শাসন কৰি আছে আৰু তেওঁ সফল হোৱা নাই নেকি সোধা এক প্রশ্নৰ উত্তৰ নকংগ্রেছী ব্ৰজেনজিৎ সিংহই কয় যে- 'সদৌ অসম ছাত্র সন্থাৰ উদ্যোগত তদানীন্তন প্রধানমন্ত্রী প্রয়াত ৰাজীৱ গান্ধীৰ উপস্থিতিত অসম চুক্তি হৈছিল ৷ আছু নেতৃত্বই চহী কৰিছিল ৷ অসম চুক্তি ৰূপায়ণ তথা অন্যান্য বহুতো বিষয় সমাধানৰ কথা আছিল ৷ কিন্তু অসম চুক্তি ৰূপায়ণ নহ’ল৷ অসম চুক্তি ৰূপায়ণৰ নিমিত্তে গঠিত হৈছিল অসম গণ পৰিষদ ৷ এই দলটো অসমত দহ বছৰকাল শাসন কৰিছিল৷ তদুপৰি দলটো বর্তমানৰ চৰকাৰৰ অংশীদাৰ ৷ কিন্তু অসম চুক্তিৰ বিপৰীত কামহে তেওঁলোকে কৰি আছে৷ অসম চুক্তি মতে ১৯৭১ চনৰ ২৪ মার্চৰ পিছত অহা বিদেশীখিনিক বহিস্কাৰৰ কথা কৈছে ৷ কিন্তু কা’ৰ জৰিয়তে ২০১৪ চনৰ ৩১ ডিচেম্বৰলৈকে বিদেশীক অনাৰ ব্যৱস্থা কৰিলে ৷ চুক্তিখনৰ ৬ নম্বৰ দফা মতে সাংবিধানিক ৰক্ষা কৱজ ৰক্ষাৰ নামত কোনো কামেই নকৰিলে ৷ তদুপৰি তেওঁ কয় যে সংসদত যেতিয়া কা’ বলবৎ কৰাৰ সময়ত ভোট হৈছিল, সেই সময়ত অগপ দলে কা’ৰ সপক্ষে ভোট দি পিছলৈ চুপ্রিমকোর্টত গোচৰ তৰাৰ নামত ৰাইজক আভুৱা ভাৰিছে ৷ 

বঙাইগাঁও কংগ্রেছক তেওঁ অকলে শক্তিশালী কৰিব নোৱাৰে বুলি কৈ দলটোক শক্তিশালী কৰাৰ ক্ষেত্ৰত ৰাইজে ভুমিকা ল'ব লাগিব বুলিও সাংবাদিকৰ আন এক প্রশ্নৰ উত্তৰত মত ব্যক্ত কৰে সিংহই ৷ তেওঁ কয় যে তেওঁৰ সৈতে যিসকল ব্যক্তিয়ে কংগ্ৰেছ দলত যোগদান কৰিছে তেওঁলোক সকলো জাতীয়তাবাদী সত্বাৰ লগত জড়িত ব্যক্তি ৷ তেওঁ নিজেও জাতীয়তাবাদী সত্বাৰ মানুহ আৰু কংগ্ৰেছ দলত যোগদান কৰাৰ পিচতো জাতীয়তাবাদী সত্বাটো শেষ হৈ যোৱা নাই ৷ জাতীয়তাবাদী সত্বাটোক তেওঁ প্ৰতিনিধিত্ব কৰে ৷ সেয়ে ৰাজ্যখনৰ যি জলন্ত সমস্যা, এই অঞ্চলৰ জলন্ত  সমস্যা, কোচ ৰাজবংশীকে ধৰি আন আন জনগোষ্ঠীসমূহৰ যিবিলাক জলন্ত সমস্যা, ছয় জনগোষ্ঠীৰ জনজাতিকৰণৰ সমস্যা,  খিলঞ্জীয়া জনগোষ্ঠীসমূহৰ সাংবিধানিক ৰক্ষা কৱচৰ বিষয়টো আছে ৷গতিকে এই সকলোবিলাক বিষয়তে এটা জাতীয়তাবাদী চেতনালৈ আগবাঢ়ি আহিছো ৷ কিন্তু অগপ দলে ইয়াৰ বিপৰীতেহে কাম কৰি আছে ৷ সেয়ে কোনে এই ধাৰাটোক শক্তিশালী কৰিব সেইটো নিশ্চয় ৰাইজে সময়ত বিবেচনা কৰিব ৷ উল্লেখ্য যে ব্ৰজেনজিৎ সিংহৰ সৈতে গুৱাহাটীত দলটোত যোগদান কৰা আনসকল ব্যক্তিও সোমবাৰে জিলা কংগ্ৰেছ কাৰ্যালয়ত উপস্থিত আছিল ৷