🔯বঙাইগাঁও জিলাক যক্ষ্মামুক্ত কৰাৰ প্ৰয়াস জিলা যক্ষ্মা ফ'ৰামৰ

🔯বঙাইগাঁও জিলাক যক্ষ্মামুক্ত কৰাৰ প্ৰয়াস জিলা যক্ষ্মা ফ'ৰামৰ🔯

#বঙাইগাঁওঃ ২০ আগষ্ট: বঙাইগাঁও জিলা আয়ুক্ত কাৰ্যালয়ৰ সভাকক্ষত মঙলবাৰে জিলা আয়ুক্ত নৱদ্বীপ পাঠকৰ সভাপতিত্বত ২০২৪-২০২৫ বৰ্ষৰ জিলা যক্ষ্মা ফ'ৰামৰ প্ৰথমখন সভা অনুষ্ঠিত হয়। জিলা যক্ষ্মা বিষয়া ডা৹ প্ৰণৱ কুমাৰ ৰয়ে আৰম্ভণি বক্তব্য ৰাখি জিলা খনৰ চৰকাৰী আৰু ব্যক্তিগত খণ্ডৰ সকলো স্বাস্থ্য কেন্দ্ৰকে সামৰি যক্ষ্মা বিষয়ক সামঞ্জস্য মূলক এটি তথ্য দাঙি ধৰে। তথ্যসমূহৰ তুলনামূলক ভিত্তি কৰি ডা৹ ৰয়ে কয় যে জনসংখ্যাৰ গড় অনুপাতে যিমানখিনি মানুহৰ  যক্ষ্মা ৰোগৰ পৰীক্ষা হ'ব লাগিছিল সিমানখিনি হোৱা নাই। এইক্ষেত্ৰত জিলা আয়ুক্তই অহা ডিচেম্বৰ মাহৰ ভিতৰত বহি: বিভাগৰ মুঠ ৰোগীৰ ৫ শতাংশৰ ওপৰত সঠিকভাৱে যক্ষ্মা ৰোগৰ পৰীক্ষা কৰিবলৈ স্বাস্থ্য বিভাগক সকিয়নী দিয়ে। সভাত বিশ্ব স্বাস্থ্য সংস্থাৰ ৰাজ্যিক বিশেষজ্ঞ ডা৹ ৰনদ্বীপ নেওগে কয় যে ৰাজ্যিক ভিত্তিত বঙাইগাঁও জিলাখন অসমৰ আন আন ৰাজ্যৰ তুলনাত যক্ষ্মা দূৰীকৰণ ক্ষেত্ৰত ভাল পাৰদৰ্শিতা আগবঢ়াই আছে , যাৰ বাবে ২০২৩ বৰ্ষত জিলাখনে ৰাষ্ট্ৰীয় পৰ্য্যায়ত ৰূপৰ পদক অৰ্জন কৰিবলৈ সক্ষম হৈছে আৰু পিছৰ পৰ্য্যায়লৈ সোণৰ পদকৰ বাবে প্ৰচেষ্টা অব্যাহত ৰাখিবলৈ পৰামৰ্শ আগবঢ়ায়। উল্লেখ্য যে ২০২৩ বৰ্ষৰ বাবে লাভ কৰা ৰূপৰ পদকটি বিশেষজ্ঞ গৰাকীয়ে এই সভাতেই জিলা স্বাস্থ্য সমিতিক আনুষ্ঠানিকভাৱে প্ৰদান কৰে। বঙাইগাঁও জিলাৰ মুঠ ৬৫ খন গাঁও পঞ্চায়তৰ ভিতৰত  ১০ খন পঞ্চায়ত যক্ষ্মা মুক্ত কৰা হয় যদিও যক্ষ্মা মুক্ত গাওঁ পঞ্চায়ত মিছন অব্যাহত থাকিব বুলি জিলা পৰিষদৰ মুখ্য কাৰ্যবাহী বিষয়া অনুপম ডেকাই জানিবলৈ দিয়ে। সভাত যক্ষ্মাৰ লগতে এইচ আই ভি ৰ ওপৰতো আলোচনা কৰা হয়। বিদ্যালয় সমূহত যক্ষ্মা ৰোগৰ লগতে এইচ আই ভি ৰ সজাগতাৰ বাবেও পৰামৰ্শ আগবঢ়োৱা হয়। সভাত যুটীয়া স্বাস্থ্য সেৱা সঞ্চালক ডা৹ বলেন্দ্ৰ নাৰায়ণ ডেকাৰ লগতে ফ'ৰামত উপস্থিত থকা আন সদস্যসকলেও নিজৰ মতামত আগবঢ়ায়।