🔯বঙাইগাঁও কেমিষ্ট এণ্ড ড্ৰাগিষ্ট এছ'চিয়েচনৰ দ্বিবাৰ্ষিক সভাৰ লগতে সজাগতা সভা সম্পন্ন🔯

🔯বঙাইগাঁও কেমিষ্ট এণ্ড ড্ৰাগিষ্ট এছ'চিয়েচনৰ দ্বিবাৰ্ষিক সভাৰ লগতে সজাগতা সভা সম্পন্ন🔯

📝বঙাইগাঁওঃ ৫ আগষ্টঃ বঙাইগাঁও কেমিষ্ট এণ্ড ড্ৰাগিষ্ট এছ'চিয়েচনৰ দ্বি-বাৰ্ষিক সভাৰ লগতে এখন গুৰুত্বপূৰ্ণ সজাগতা সভা দেওবাৰে অনুষ্ঠিত হয় ৷ বঙাইগাঁও চহৰৰ বৰপাৰাৰ যতীন্দ্ৰ ভৱনত এছ'চিয়েচনৰ ভাৰপ্ৰাপ্ত সভাপতি অৰূপ কুমাৰ মৌলিকৰ অধ্যক্ষতাত অনুষ্ঠিত এই সভাত অতিৰিক্ত জিলা আয়ুক্ত অপূৰ্ব কুমাৰ নাথ, ভাৰপ্ৰাপ্ত ৰাজ্যিক ঔষধ নিয়ন্ত্ৰক বিশ্বজিৎ তালুকদাৰ, প্ৰাক্তন ঔষধ নিয়ন্ত্ৰক গজেন তালুকদাৰৰ উপৰি বঙাইগাঁও আৰু বাক্সা জিলাৰ ঔষধ পৰিদৰ্শক লিপিকা বড়ো আৰু ডাঃ ঈশ্বৰ হাজৰিকা সন্মানীয় অতিথি হিচাপে উপস্থিত আছিল। একেদৰে সভাত বিশেষ অতিথি হিচাপে উপস্থিত থাকে অসম কেমিষ্ট এণ্ড ড্ৰাগিষ্ট এছ'চিয়েচনৰ সভাপতি ড° নটৱাৰলাল আগৰৱালা। দুটা ভাগত অনুষ্ঠিত হোৱা এই সভা পৰিচালনা কৰে কোষাধ্যক্ষ মহেশ কুমাৰ আগৰৱালাই ৷ অনুষ্ঠানত অতিথি সকলোক ফুলোম গামোছা আৰু উপহাৰেৰে সম্বৰ্ধনা জনোৱা হয় । অতিথি সকলৰ দ্বাৰা বন্তি প্ৰজ্বলন আৰু অসমৰ জাতীয় সংগীতেৰে আৰম্ভ হোৱা সভাৰ আৰম্ভণিতে একমিনিট মৌনতা অৱলম্বন কৰি প্ৰয়াত সদস্যসকললৈ শ্ৰদ্ধাঞ্জলি জনোৱা হয়। সংগঠনটোৰ ভাৰপ্ৰাপ্ত সভাপতি অৰূপ কুমাৰ মৌলিকে ৰখা আদৰণি ভাষণত সকলোকে একেলগে কাম কৰিবলৈ আহ্বান জনায়। সভাত অতিৰিক্ত জিলা আয়ুক্ত অপূৰ্ব কুমাৰ নাথে ভাষণত সংগঠনটোৰ ঐক্যৰ ওপৰত গুৰুত্ব আৰোপ কৰি কয় যে যদি ড্ৰাগছ বিক্ৰেতা সংগঠনে জিলাখনৰ উন্নয়নৰ বাবে কোনো স্থায়ী প্ৰকল্প আনে তেন্তে জিলা প্ৰশাসনে ভূমি প্ৰদানত সহায় কৰিব। সভাত ভাৰপ্ৰাপ্ত ঔষধ নিয়ন্ত্ৰক বিশ্বজিৎ তালুকদাৰে নিজৰ ভাষণত ঔষধ খণ্ডৰ সৈতে জড়িত বিভিন্ন দিশৰ ওপৰত আলোকপাত কৰি সকলোকে নিয়ম অনুসৰি কাম কৰিবলৈ আহ্বান জনায়। আনহাতে গজেন তালুকদাৰ, লিপিকা বড়ো, ডাঃ ঈশ্বৰ হাজৰিকাই ঔষধ খণ্ডৰ সৈতে জড়িত চৰকাৰী নিয়মাৱলী পালন কৰি কেনেকৈ দক্ষতাৰে ব্যৱসায়ক অধিক শক্তিশালী কৰি তুলিব পাৰি সেই বিষয়ে আলোচনা কৰে। ইয়াৰ পিছতে অনুষ্ঠিত হয় মূল সাধাৰণ সভা ৷ 

সভাত সংগঠনটোৰ সম্পাদক অশোক চৌধুৰীয়ে তেওঁৰ দুবছৰীয়া কাৰ্যকালৰ হিচাপ-নিকাচ তথা সম্পাদকীয় প্ৰতিবেদন দাখিল কৰে ৷ সভাত সৰ্বসন্মতিক্ৰমে অৰূপ কুমাৰ মল্লিকক পূৰ্ণকালীন সভাপতি আৰু পৰমানন্দ পাটগিৰীক উপ সভাপতিৰ দায়িত্ব অৰ্পণ কৰা হয়। সভাৰ অন্তত 'আমাৰ কথা' নামৰ মূল অনুষ্ঠানৰ আয়োজন কৰা হয় ৷ ইয়াত উপস্থিত সদস্যসকলে নিজৰ নিজৰ কথা আৰু মন্তব্য দাঙি ধৰে। ৰাজ্যিক সভাপতি ডাঃ নটৱাৰলাল আগৰৱালাই সভাত ভাষণ দি সদস্যসকলে উত্থাপন কৰা প্ৰশ্নৰ উত্তৰ দি ঔষধ ব্যৱসায়ৰ সৈতে জড়িত বিভিন্ন বিষয়ৰ ওপৰত আলোচনা কৰে আৰু অনলাইন কোম্পানীসমূহে সংঘটিত কৰা অনিয়মৰ বিষয়ে সচেতন হ’বলৈ আহ্বান জনায়। সভাৰ সময়ত বিনামূলীয়াকৈ লাকী ড্ৰ’ৰ আয়োজন কৰা হয় , যিটো সকলো সদস্যৰ মাজত বিশেষ আকৰ্ষণৰ কেন্দ্ৰবিন্দু আছিল। শেষত কোষাধ্যক্ষ মহেশ কুমাৰ আগৰৱালাই শলাগৰ শৰাই আগবঢ়ায় আৰু ৰাষ্ট্ৰীয় সংগীতেৰে সভাৰ সামৰণি পৰে ৷