🔯বঙাইগাঁও ৰাজীৱ ভৱনত কংগ্ৰেছৰ উপ নিৰ্বাচন পৰ্যবেক্ষণ কমিটিৰ দলীয় কৰ্মীৰে সভা🔯

🔯বঙাইগাঁও ৰাজীৱ ভৱনত কংগ্ৰেছৰ উপ নিৰ্বাচন পৰ্যবেক্ষণ কমিটিৰ দলীয় কৰ্মীৰে সভা🔯

বঙাইগাঁৱত এইবাৰ কংগ্ৰেছ জয় হ'ব- জাকিৰ হুছেইন শিকদাৰ 

বাংলাদেশত যাতে চীনে ঘাটি স্থাপন কৰিব নোৱাৰে তাৰ বাবে মুখ্যমন্ত্ৰীয়ে প্ৰধানমন্ত্ৰীৰ সৈতে বৈঠক কৰি পৰামৰ্শ দিয়ক 

চৰকাৰে এনেকুৱা বিকাশ কৰিলে যে বৰষুণতে স্তব্ধ হৈ পৰিল গুৱাহাটী- পৃথিৰাজ সাথে 

📝বঙাইগাঁওঃ ৭ আগষ্টঃ আগন্তুক বঙইগাঁও বিধানসভা সমষ্টিৰ  উপ নিৰ্বাচনকলৈ তৎপৰ হৈ পৰিছে বিৰোধী দল কংগ্ৰেছ ৷ দলটোৱে যি কোনো প্ৰকাৰে সমষ্টিটো দখলৰ বাবে লাগিছে উঠি পৰি ৷ যাৰ বাবে সঘনাই দলটোৰ ৰাজ্যিক কমিটিৰ বিষয়ববীয়া বঙাইগাঁৱত উপস্থিত হৈ বুজ লৈছে দলটোৰ সাংগঠনিক দিশৰ লগতে সকলো বিষয়ৰ ৷ বুধবাৰেও বঙাইগাঁৱত উপস্থিত হয় উপ নিৰ্বাচন পৰ্যবেক্ষণ কমিটিৰ লগতে দলটোৰ ৰাষ্ট্ৰীয় সম্পাদক তথা প্ৰদেশ কংগ্ৰেছৰ সহ প্ৰভাৰী পৃথিৰাজ সাথে ৷ ইয়াৰ পিচতে বঙাইগাঁও জিলা কংগ্ৰেছৰ কাৰ্যালয় ৰাজীৱ ভৱনত সমষ্টিটোৰ উপ নিৰ্বাচন পৰ্যবেক্ষণ কমিটিৰ কংগ্ৰেছ দলৰ নেতা- কৰ্মীৰে অনুষ্ঠিত হয় এখন সভা ৷ সভাত নিৰ্বাচন সম্পৰ্কে আলোচনা হোৱাৰ লগতে দলটোৰ সাংগঠনিক দিশ, নিৰ্বাচনকলৈ প্ৰস্তুতি আদি বিভিন্ন দিশৰ ওপৰত আলোচনা হয় । বঙাইগাঁও জিলা কংগ্ৰেছৰ সভাপতি আবুল কাছেমৰ সভাপতিত্বত অনুষ্ঠিত সভাত অসম প্ৰদেশ কংগ্ৰেছ কমিটিৰ কাৰ্যকৰী সভাপতি তথা বিধায়ক জাকিৰ হুছেইন শিকদাৰ, উপ সভাপতি ববিতা শৰ্মা, সাধাৰণ সম্পাদক প্ৰদ্যুৎ কুমাৰ ভূঞা, ৰাষ্ট্ৰীয় সম্পাদক পৃথিৰাজ সাথে আদিৰ লগতে বিধায়ক আব্দুল বাতেন খণ্ডকাৰ , বিধায়ক প্ৰদীপ সৰকাৰ, প্ৰদেশ কংগ্ৰেছৰ সম্পাদক জ্যোতিৰ্ময় বৈশ্যৰ লগতে জিলা, ব্লক, মণ্ডল কমিটিৰ বিষয়ববীয়া আৰু দলীয় কৰ্মী উপস্থিত থাকে ৷ ইপিনে প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰে সংবাদ মাধ্যমৰ আগত কয় যে বঙাইগাঁও বিধানসভা সমষ্টিৰ উপ নিৰ্বাচনকলৈ নিখল ভাৰত কংগ্ৰেছ কমিটি আৰু অসম প্ৰদেশ কংগ্ৰেছ কমিটি অত্যন্ত সৰৱ ৷ বঙাইগাঁও বিধানসভা সমষ্টিৰ বুথ কমিটি, মণ্ডল কমিটি, ব্লক কমিটি, জিলা কংগ্ৰেছ কমিটিৰ লগতে জিলাখনৰ তথা বিধানসভা সমষ্টিৰ দলৰ নেতা- কৰ্মীসকলৰ সহযোগত এই আসনখনত যাতে বিৰোধী দলৰ প্ৰাৰ্থী জয়ী হ'ব পাৰে তাৰ কাৰণে কাম কৰাৰ বাবে তেওঁলোক বঙাইগাঁওলৈ আহিছে ৷ লগতে কয় যে দলৰ কৰ্মীসকল উৎসাহিত হৈ পৰিছে আৰু সকলোৱে সাহক পাইছে  ৷ লগতে ভাবিছে যে এইবাৰ দলৰ প্ৰাৰ্থী বিজয়ী হ'ব ৷ ইয়াৰ বাবে কৰ্মীসকলে লাগি পৰিছে বুলিও কয় ৷

কাৰ্যকৰী সভাপতি শিকদাৰে কয় যে নিৰ্বাচনৰ দিন ঘোষণাই হোৱা নাই, কিন্তু তাৰপূৰ্বেই এইবাৰ কংগ্ৰেছে বঙাইগাঁও সমষ্টিটো দখল কৰিবই বুলি প্ৰতিজন নেতা - কৰ্মীয়ে কঁকালত টঙালি বান্ধি যুঁজ দিয়াৰ বাবে সাঁজু হৈছে ৷ এই ক্ষেত্ৰত ইয়াত নিখিল ভাৰত কংগ্ৰেছ কমিটি আৰু অসম প্ৰদেশ কংগ্ৰেছ কমিটিয়ে পূৰ্ণ সহযোগিতা আগবঢ়াব ৷ প্ৰদেশ কংগ্ৰেছৰ কাৰ্যকৰী সভাপতি শিকদাৰে আৰু কয় যে আমি ইয়াত বাহৰ পাতিম আৰু প্ৰতিটো বুথ কমিটি আৰু মানুহৰ ঘৰে ঘৰে যাম ৷ এই বাৰ আমি যি কোনো প্ৰকাৰেই হওঁক অগপৰ ফনীভূষণ চৌধুৰীৰ দুৰ্গক অক্ষত থাকিবলৈ নিদিও ৷ এইবাৰ কংগ্ৰেছে বঙাইগাঁও সমষ্টি দখল কৰিব ৷ বঙাইগাঁও অগপৰ আছিল, কিন্তু আহি থকা দিনত বঙাইগাঁও বিধানসভা সমষ্টিটো কংগ্ৰেছৰ হ'ব বুলিও কয় ৷ আনহাতে প্ৰাৰ্থী সন্দৰ্ভত কয় যে নিৰ্বাচন আয়োগে যেতিয়া নিৰ্বাচনৰ দিন ঘোষণা কৰিব, তেতিয়া অসম প্ৰদেশ কংগ্ৰেছ কমিটিয়ে বঙাইগাঁও সমষ্টিত কোনে কোনে নিৰ্বাচন খেলিব বিচাৰে তাৰ বাবে আবেদন বিচাৰিব ৷ আবেদন কৰাৰ পিছত তাৰ ওপৰত কথ - বতৰা হ'ব, ইয়াৰ কৰ্মীসকলৰ লগতে সাংগঠনিক দিশত জড়িত নেতা- কৰ্মীসকলৰ লগত আলাপ আলোচনা কৰি বঙাইগাঁৱৰ কংগ্ৰেছ কৰ্মীসকলৰ পছন্দৰ প্ৰাৰ্থী সমষ্টিটোৰ উপ নিৰ্বাচনৰ প্ৰাৰ্থী হ'ব ৷ তেওঁ লগতে কয় যে আবেদন কৰাসকলৰ নামলৈ পুনৰ বঙাইগাঁও লৈ আহিব আৰু দীৰ্ধদিন ধৰি যিসকলে দিনে ৰাতিয়ে কষ্ট কৰি কংগ্ৰেছ দল কৰি আছে তেওঁলোকৰ লগত কথা বতৰা পাতি প্ৰাৰ্থী চূড়ান্ত কৰিব ৷ আনহাতে কিছুদিন পূৰ্বে বঙাইগাঁও টাউন ব্লকৰ সভাপতিয়ে পদত্যাগ কৰা সন্দৰ্ভত কয় যে তেওঁ আমাৰ সভাতে আছে ৷ ইপিনে বাংলাদেশৰ বৰ্তমানৰ পৰিস্থিতিৰ পিচতে মুখ্যমন্ত্ৰীয়ে অসমৰ ভৱিষ্যতকলৈ চিন্তিত হৈ পৰা বুলি সামাজিক মাধ্যমত কৰা মন্তব্য সন্দৰ্ভত প্ৰদেশ কংগ্ৰেছৰ কাৰ্যকৰী সভাপতি শিকদাৰে কয় যে মুখ্যমন্ত্ৰীগৰাকী বাংলাদেশৰ পৰিস্থিতিকলৈ চিন্তিত হোৱাটো ভাল কথা ৷ কিন্তু চিন্তিত হৈ বিষয়টো যাতে ৰাজনীতিকৰণৰ দিশে যাতে লৈ নাযায় ৷ বাংলাদেশৰ পৰিস্থিতি আৰু আমাৰ দেশ ভাৰতবৰ্ষৰ সাৰ্বভৌমত্বৰ বহু কথা জড়িত ৷ চিন্তিত মুখ্যমন্ত্ৰীয়ে দিল্লীলৈ গৈ প্ৰধানমন্ত্ৰীৰ লগত বহি বাংলাদেশত যাতে চীনে ঘাটি স্থাপন কৰিব নোৱাৰে তাৰ কাৰণে ভাৰতবৰ্ষই কি ভূমিকা ল'ব লাগে সেই বিষষে তেওঁ প্ৰধানমন্ত্ৰীক পৰামৰ্শ দিয়ক ৷ 

আনহাতে নিখিল ভাৰত কংগ্ৰেছ কমিটিৰ সম্পাদক তথা অসম প্ৰদেশ কংগ্ৰেছৰ সহ প্ৰভাৰী পৃথিৰাজ সাথেই কয় যে অসমত অনুষ্ঠিত হ'বলগীয়া বিধানসভাৰ উপ নিৰ্বাচনৰ বাবে নিখিল ভাৰত কংগ্ৰেছ কমিটিয়ে এখন পাঁচজনীয়া কমিটি গঠন কৰি দিছে ৷ সেই কমিটিৰ জাকিৰ হুছেইন শিকদাৰ হ'ল মুখ্য ব্যক্তি ৷ আমি মূলত সমষ্টিটোত দলীয় কৰ্মীসকলৰ নিৰ্বাচনকলৈ কেনেকুৱা প্ৰস্তুতি সেই সন্দৰ্ভত অৱগত হোৱাৰ বাবে আহিছো ৷ বুথ কমিটি আছে নে নাই, আছে যদি কেনেকুৱা পৰ্যায়ত আছে আদি বিষয়বোৰৰ বুজলৈ অহা দহ দিনৰ ভিতৰত প্ৰথমে দলটোৰ সাংগঠনিক দিশ  আৰু অধিক শক্তিশালী ৰূপত গঢ়ি তোলাটোৱে মূল উদ্দেশ্য ৷ লগতে কিদৰে নিৰ্বাচনত দলটোৱে সফলতা লাভ কৰিব পাৰে তাৰ বাবে এক নীতি প্ৰস্তুত কৰাৰ বাবেও প্ৰয়াস চলি আছে বুলিও উল্লেখ কৰে ৷  ৰাষ্ট্ৰীয় সম্পাদকগৰাকীয়ে কোনো দলৰ নাম উল্লেখ নকৰাকৈ কৈ যে এটা পৰিয়ালকে কিমানবাৰ টিকত দিব সেই লৈ প্ৰশ্ন উত্থাপিত হৈছে ৷ একেই প্ৰশ্ন গোটেই দেশ তথা অসমতো উত্থাপিত হৈছে ৷ বৰষুণতে গুৱাহাটী স্তব্ধ হৈ পৰিল ৷ এনেকুৱা বিকাশ ৰাজ্য চৰকাৰ তথা মুখ্যমন্ত্ৰীয়ে কৰিছে ৷ সেই চৰকাৰৰে অংশীদাৰ হ'ল বঙাইগাঁৱৰ প্ৰাক্তন বিধায়ক তথা বৰ্তমানৰ সাংসদগৰাকী ৷ গতিকে এনে মিছা বিকাশৰ বিৰুদ্ধে আগন্তুক নিৰ্বাচনত নিশ্চিত ৰূপত বঙাইগাঁও বিধানসভা সমষ্টিত পৰিৱৰ্তন দেখিবলৈ পাব ৷ দলটোৰ সম্পাদকগৰাকীয়ে বঙাইগাঁৱত শক্তিশালী তথা ভাল প্ৰাৰ্থী দিব বুলিও কয় ৷ লগতে কংগ্ৰেছ দলত যোগদান কৰিবলগীয়া প্ৰাক্তন আৰক্ষী বিষয়া ব্ৰজেনজিৎ সিংহ সন্দৰ্ভত কয় যে তেওঁ দলৰ নীতি আৰু আদৰ্শৰ প্ৰতি আকৃষ্ট হৈহে দলত যোগদান কৰিব বুলি কৈছে ৷ লগতে নিৰ্বাচনত প্ৰতিদ্বন্দ্বিতা কৰা , সংগঠন আদি বেলেগ বিষয় বুলি কৈ জীৱনৰ বাকী সময়চোৱা দলটোৰ হৈ কাম কৰাৰ ইচ্ছা প্ৰকাশ কৰা বুলিও কোৱা বুলি কয় ৷🔯