🔯বঙাইগাঁৱত কৃতী গণিত শিক্ষক অৰুণ কুমাৰ কংসবণিকৰ স্মৃতিচাৰণ সভা🔯

 🔯বঙাইগাঁৱত কৃতী গণিত   শিক্ষক অৰুণ কুমাৰ কংসবণিকৰ স্মৃতিচাৰণ সভা🔯

📝বঙাইগাঁওঃ ৮ আগষ্টঃ অসম গণিত শিক্ষায়তনৰ বঙাইগাঁও  শাখাৰ উদ্যোগত বৃহস্পতিবাৰে অসম গণিত শিক্ষায়তনৰ  প্ৰতিষ্ঠাপক আজীৱন সদস্য তথা ধুবুৰী জিলাৰ চাপৰ নিৱাসী চাপৰ উচ্চতৰ মাধ্যমিক বিদ্যালয়ৰ অৱসৰী অধ্যক্ষ,  এগৰাকী কৃতী গণিতৰ শিক্ষক, শিক্ষায়তনৰ চাপৰ শাখাৰ অভিভাৱক প্ৰয়াত অৰুণ কুমাৰ কংসবণিকলৈ শ্ৰদ্ধাঞ্জলি জ্ঞাপন কৰাৰ উদ্দেশ্যে এখন স্মৃতিচাৰণ সভাৰ আয়োজন কৰে। উল্লেখ্য যে যোৱা ২ আগষ্ট বাৰ্দ্ধক্যজনিত অসুস্থতাৰ কাৰণত  গুৱাহাটীৰ  এখন চিকিৎসালয়ত অৰুণ কুমাৰ কংসবণিকৰ দেহাৱসান ঘটিছিল ৷ অসম গণিত শিক্ষায়তনৰ বঙাইগাঁও শাখাৰ সম্পাদক অৰূপজ্যোতি মজুমদাৰে আঁত ধৰা অনুষ্ঠানটোৰ আৰম্ভণিতে প্ৰয়াত কংসবণিকৰ  প্ৰতিচ্ছবিত পুস্পাঞ্জলি প্ৰদান, বন্তি প্ৰজ্বলন আৰু একমিনিট সময় মৌনতা অৱলম্বন কৰি তেওঁলৈ শ্ৰদ্ধা জ্ঞাপন কৰা হয়। 

ইয়াৰ পিচতে শিক্ষায়তনৰ বঙাইগাঁও শাখাৰ সভাপতি মানবেন্দ্ৰ দাসৰ সভাপতিত্বত অনুষ্ঠিত স্মৃতিচাৰণ সভাত শাখাৰ প্ৰাক্তন সভাপতি তথা বীৰঝৰা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত গণিতৰ শিক্ষক জিতেন্দ্ৰ চন্দ্ৰ মিশ্ৰ ভাগৱতীয়ে তেখেতৰ সৈতে প্ৰয়াত অৰুণ কংসবণিকৰ সান্নিধ্যকালীন সময়ৰ স্মৃতি ৰোমন্থন কৰে। আনহাতে অসম গণিত শিক্ষায়তনৰ কেন্দ্ৰীয় কাৰ্যনিৰ্বাহক সমিতিৰ কাৰ্যকৰী সভাপতি বীৰব্ৰত দাস চৌধুৰীয়ে নিজৰ বক্তব্য প্ৰসংগত অসম গণিত শিক্ষায়তনৰ জন্মলগ্নৰে পৰা প্ৰয়াত কংসবণিকৰ শিক্ষায়তনৰ কাম কাজত সক্ৰিয়তা আৰু শিক্ষায়তনৰ চাপৰ শাখা গঠন কৰি আজীৱন শাখাটোৰ অভিভাৱক হিচাপে অঞ্চলটোত গণিত শিক্ষাৰ প্ৰসাৰ-প্ৰচাৰৰ হকে অহোপুৰুষাৰ্থ কৰাৰ লগতে বঙাইগাঁও শাখাৰ বিভিন্ন কাৰ্যক্ৰমত অংশগ্ৰহণ কৰাৰ উপৰিও দিহা পৰামৰ্শ  আগবঢ়াইছিল বুলি উল্লেখ কৰে। আনকি কংসবণিকৰ প্ৰস্তাৱ মৰ্মেই শিক্ষায়তনৰ  ত্ৰৈমাসিক আলোচনীখনৰ নাম 'গণিত বিকাশ' হিচাপে গৃহীত হৈছিল বুলি চৌধুৰীয়ে উল্লেখ কৰে। 

সভাত বীৰঝৰা  ছোৱালী উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ তথা প্ৰয়াত কংসবণিকৰ একালৰ ছাত্ৰ ছত্ৰসিং চৌধুৰীয়ে তেওঁৰ শিকনশৈলী আৰু বিষয়বস্তুৰ ওপৰত থকা গভীৰতাৰ দিশ উল্লেখ কৰি প্ৰয়াত শিক্ষকগৰাকীৰ স্মৃতিত শ্ৰদ্ধাঞ্জলি জ্ঞাপন কৰে। প্ৰয়াত অৰুণ কুমাৰ কংসবণিকৰ আন এগৰাকী ছাত্ৰ তথা বৰ্তমান বঙাইগাঁও পলিটেকনিক কাৰ্যালয়ৰ কনিষ্ঠ সহায়ক  মান্নালাল প্ৰসাদে তেওঁলৈ শ্ৰদ্ধা নিৱেদন কৰি চাপৰ অঞ্চলত গণিত চৰ্চা আৰু কুইজৰ প্ৰচাৰ -প্ৰসাৰত প্ৰয়াত শিক্ষকগৰাকীৰ উল্লেখযোগ্য অবদান থকাৰ কথা উল্লেখ কৰে।

ইপিনে শাখাৰ সভাপতি মানবেন্দ্ৰ দাসে সভাপতিৰ ভাষণ প্ৰসংগত অৰুণ কুমাৰ কংসবণিকে আজীৱন গণিত শিক্ষাৰ প্ৰসাৰত ব্ৰতী হৈ গণিত চৰ্চাৰ পৰিবেশ গঢ়ি তোলাত সৱল ভূমিকা গ্ৰহণ কৰাৰ কথা উল্লেখ কৰে লগতে  শাখাৰ তৰফৰ পৰা তেওঁৰ মৃত্যুত শোক প্ৰকাশ আৰু মৃতকৰ পৰিয়ালবৰ্গলৈ সমৱেদনা জ্ঞাপন কৰি  প্ৰস্তুত কৰা এটি শোকবাৰ্তা পাঠ কৰে। উল্লেখ্য যে ১৯৪৩ চনৰ ১ এপ্ৰিলত জন্মগ্রহণ কৰা অৰুণ কুমাৰ কংসবণিকে ১৯৫৯ চনত হাইস্কুল শিক্ষান্ত পৰীক্ষা, ১৯৬৩ চনত বি.এছ ছি আৰু ১৯৬৫ চনত এম এছ.ছি পাছ কৰে। তাৰ পিচত ১৯৬৩ চনত চাপৰ উচ্চতৰ মাধ্যমিক বিদ্যালয়ত বিজ্ঞান শাখাত গণিতৰ শিক্ষক হিচাপে চাকৰিত যোগদান কৰি ২০০১ চনত চাপৰ উচ্চতৰ মাধ্যমিক বিদ্যালয়ৰ পৰা ভাৰপ্ৰাপ্ত অধ্যক্ষৰূপে সেৱা আগবঢ়াই অৱসৰ গ্ৰহণ কৰিছিল। ১৯৯৭ চনত কৃতী শিক্ষক ৰূপে ৰাজ্যিক বঁটাও লাভ কৰিছিল। স্মৃতিচাৰণ সভাখন বঙাইগাঁৱৰ বীৰঝৰা কন্যা মহাবিদ্যায়ত অনুষ্ঠিত হয় 🔯