🔯কৃত্ৰিম বানৰ পানীকলৈ মন্ত্ৰীৰ ৰঙাপানী - ক'লাপানী মন্তব্য🔯

🔯 কৃত্ৰিম বানৰ পানীকলৈ মন্ত্ৰী অশোক সিংহলৰ ৰঙাপানী - ক'লাপানী মন্তব্য🔯

সম্যক জ্ঞান নথকা মন্ত্ৰীৰ হাতত এনেকুৱা দপ্তৰ দিলে এনেকুৱা হ'বই - জাকিৰ হুছেইন শিকদাৰ 

আগলৈ যাতে গুৱাহাটীবাসী বিপদত নপৰে তাৰ বাবে ব্যৱস্থা লবলৈকো চৰকাৰক সকিয়নী 

📝বঙাইগাঁওঃ ৭ আগষ্টঃ গুৱাহাটীৰ কৃত্ৰিম বানৰ পানীৰ ৰঙকলৈ মহানগৰ উন্নয়ন মন্ত্ৰী অশোক সিংহলে কৰা 'ৰঙাপানী - ক'লাপানী ' মন্তব্যকলৈ এতিয়া তীব্ৰ প্ৰতিক্ৰিয়াৰ সৃষ্টি হৈছে ৷ এই সন্দৰ্ভত বুধবাৰে বঙাইগাঁওলৈ দলীয় কাৰ্যসূচীত অংশ ল'বলৈ অহা অসম প্ৰদেশ কংগ্ৰেছৰ কাৰ্যকৰী সভাপতি জাকিৰসহুছেইন শিকদাৰে সংবাদ মাধ্যমৰ আগত প্ৰতিক্ৰিয়া প্ৰকাশ কৰি কয় যে বিগত ২০১৬ চনৰ পৰা বিজেপিয়ে অসমৰ বিভিন্ন প্ৰান্তৰ লগতে গুৱাহাটীত ডাঙৰ ডাঙৰ বেনাৰ লগাইছিল ৷ য'ত ২৪ ঘন্টা বিজুলীৰ গেৰান্টি, দুৰ্নীতিমুক্ত অসম গঢ়াৰ গেৰান্টি আৰু গুৱাহাটীত লগাইছিল দুবছৰৰ ভিতৰত কৃত্ৰিম বানপানীমুক্ত গুৱাহাটী গঢ়িব বুলি উল্লেখ কৰিছিল ৷ বেনাৰ দেখিলে ৰাইজে ভোট দিলে সৰ্বানন্দ সোনোৱাল মুখ্যমন্ত্ৰী হ'ল আৰু এতিয়া ডঃ হিমন্ত বিশ্ব শৰ্মা মুখ্যমন্ত্ৰী ৷ বিজেপি এজিপিৰ চৰকাৰ ৷ গেৰান্টি দিলে, গেৰান্টিৰ পৰা ভোট লাভ কৰিলে, চৰকাৰ হ'ল,মন্ত্ৰী- বিধায়ক হ'ল ৷ কিন্তু কোনো গেৰান্টি তেওঁলোকে কাৰ্যকৰী নকৰিলে ৷ বৰঞ্চ বিজেপিয়ে চৰকাৰ গঠন কৰাৰ পিচৰে পৰা গুৱাহাটীকে ধৰি সমগ্ৰ অসমৰ চহৰসমূহত কৃত্ৰিম বানপানীৰ সমস্যা বেছিহে হৈছে ৷ বঙাইগাঁৱৰ কথাই কওক, ওচৰৰ ধুবুৰীৰ কথাই কওক, বৰপেটা, বৰপেটা ৰোডৰ কথাই কওক গোটেই  অসমতে সমস্যা আৰু বৃদ্ধিহে হৈছে ৷ আনহাতে গুৱাহাটী উন্নয়ন দপ্তৰৰ মন্ত্ৰীগৰাকীৰ গুৱাহাটীৰ বিষয়ে সম্যক জ্ঞানেই নাই বুলি মন্তব্য কৰে ৷ লগতে কয় যে যিজনে কৃত্ৰিম বানপানী কেনেকৈ ৰোধ কৰিব পাৰি সেই সম্পৰ্কে আজিলৈকে এখন সভাই নাপাতিলে ৷ টকা আনিলে, আঁচনি ধৰিলে ৷ কিন্তু আঁচনিখন ৰূপায়ণ হ'ল নে নাই কোনো খবৰ নাই ৷ যেতিয়া গুৱাহাটীত কৃত্ৰিম বানপানী হ'ল তেতিয়া উপস্থিত হৈ ৰাইজক বুৰ্বক বুলি ভাবি নানা মন্তব্য কৰে ৷ কৃত্ৰিম বানপানী হৈছে চাৰি- পাঁচ ঘণ্টা ৷ মই যিমান দিনৰ পৰা গুৱাহাটীলৈ যাও বা জানো আজিলৈকে এনেকুৱা অসুবিধা কেতিয়াও হোৱা নাছিল  ৷ দ্বৈত ইঞ্জিনৰ চৰকাৰ থকাৰ পিচত তথা এ ফৰ আসাম বুলি কোৱা দেশৰ প্ৰধানমন্ত্ৰী নৰেন্দ্ৰ মোডীৰ গুৱাহাটীৰ প্ৰতি সুদৃষ্টি থকা বুলি কয় ৷ তাৰ পিচত গুৱাহাটীবাসীৰ এই অৱস্থা হোৱা অসমৰ ইতিহাসত আগতে কেতিয়াও হোৱা নাছিল ৷ মই নিজেও সিদিনা কৃত্ৰিম বানপানীৰ কৱলত পৰিছিলো ৷ কিমান ৰাইজৰ অসুবিধা হৈছে,অথচ চৰকাৰী পক্ষৰ পৰা খবৰ লোৱাৰ বাবে তথা মানুহক উদ্ধাৰ কৰাৰ বাবে এজনো মানুহ নাছিল ৷  আৰক্ষীক  তথা বিষয়াসকলক ফোন কৰে যদিও কোনো সহাৰি পোৱা নাছিল ৷

ইয়াৰ বিপৰীতে মন্ত্ৰী অশোক সিংহলে পিচত আহি কয় যে এয়া ৰঙা পানী, ক'লা পানী ৷ গতিকে মই ভাবো যে সম্যক জ্ঞান নথকা মন্ত্ৰীৰ হাতত যেতিয়া এনেকুৱা দপ্তৰ দিয়ে আৰু মুখ্যমন্ত্ৰীৰ লগতে বিজেপি - এজিপিৰ এই সমস্যা সমাধানৰ ইচ্ছা নথকা কাৰণে তেওঁলোকৰ দিনত এনেকুৱা হ'বই ৷ সেয়ে ৰাইজে সিদ্ধান্ত ল'ব লাগিব যে এই ৰঙা পানী আৰু ক'লা পানীৰ এই চৰকাৰখনক তথা মন্ত্ৰী সিংহলক বৃটিছে স্বাধীনতা আন্দোলনত জপিয়াই পৰাসকলক যেনেকৈ অভিশপ্ত ক'লাপানীত দিছিল ঠিক তেনেকৈ আহি থকা নিৰ্বাচনত তালৈ পঠিয়াব লাগিব ৷ আনহাতে মুখ্যমন্ত্ৰীয়ে গুৱাহাটীৰ কৃত্ৰিম বানপানীৰ বাবে ইউএছটিএম আৰু দিল্লী পাব্লিক স্কুলক জগৰীয়া কৰা সন্দৰ্ভত কংগ্ৰেছৰ কাৰ্যকৰী সভাপতিগৰাকীযে কয় যে মুখ্যমন্ত্ৰী আৰু ৰাজ্য চৰকাৰৰ এতিয়া প্ৰথম দায়িত্ব হ'ল কৃত্ৰিম বানপানী ৰোধ কৰা ৷ কি কি কাৰণত হৈছে তেওঁলোকে কওক আৰু ব্যৱস্থা লওক ৷ কত্ৰিম বানপানী হোৱাৰ পিচত তেওঁলোকে বিভিন্ন কাৰণ কৈ আছে ৷ চৰকাৰ যে ব্যৰ্থ হৈছে সেইটো প্ৰথমে স্বীকাৰ কৰক ৷ ৰাজ্যৰ বিজেপি- এজিপি চৰকাৰখনে প্ৰথমে গুৱাহাটীবাসী তথা ৰাজ্যবাসীক ক্ষমা খোজক যে আমি ব্যৰ্থ ৷  আমি আপোনালোকক ৰক্ষণাবেক্ষণ তথা সুবিধা দিব পৰা নাই ৷ আপোনালোকে বিপদত ককবকাই আছে যদিও আমি ৰক্ষা কৰিব পৰা নাই ৷ সেয়ে তাৰ কাৰণে প্ৰথমে ক্ষমা খোজক ৷ তাৰ পিচত কাৰণসমূহ কওক আৰু তাৰ সমাধান কৰক ৷ ৰাইজক সমাধান লাগে ৷ প্ৰদেশ কংগ্ৰেছৰ কাৰ্যকৰী সভাপতি শিকদাৰে ইয়াৰ পিচত যাতে গুৱাহাটীবাসী বিপদত নপৰে তাৰ বাবে ব্যৱস্থা লবলৈকো চৰকাৰক সকিয়াই দিয়ে ৷🔯