🔯১৫ আগষ্টৰ ভিতৰত কেএলঅৰে শান্তি আলোচনা সম্পূৰ্ণ কৰাৰ দাবী কমতাপুৰ ষ্টেট ডিমাণ্ড কাউন্সিলৰ🔯

🔯১৫ আগষ্টৰ ভিতৰত কেএলঅৰে শান্তি আলোচনা সম্পূৰ্ণ কৰাৰ দাবী কমতাপুৰ ষ্টেট ডিমাণ্ড কাউন্সিলৰ🔯

অন্যথা গণ আন্দোলন গঢ়ি তোলাৰ লগতে ৰাষ্ট্ৰীয় ঘাই পথ বন্ধ, ৰে'ল অৱৰোধ, অসম, বেংগল আৰু বিহাৰ বন্ধৰ দৰে কাৰ্যসূচী গ্ৰহণৰ হুংকাৰ

📝বঙাইগাঁওঃ ৬ আগষ্ট: কোচ ৰাজবংশীসকলৰ দীৰ্ঘ দিনীয়া দাবীক লৈ শান্তি আলোচনা অব্যাহত ৰখা কেএলঅৰ অধ্যক্ষ জীৱন সিংহ কোচৰ সৈতে অহা ১৫ আগষ্টৰ ভিতৰত আলোচনা সম্পূৰ্ণ কৰি সমাধানৰ ব্যৱস্থা নকৰিলে তীব্ৰ আন্দোলনৰ হুংকাৰ দিছে কমতাপুৰ ষ্টেট ডিমাণ্ড কাউন্সিলে (কেএছডিচি) ৷  মঙলবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত সংগঠনটোৰ নেতৃত্বই চৰকাৰৰ শেহতীয়া স্থিতিত ক্ষোভ প্ৰকাশ কৰাৰ লগতে যদিহে চৰকাৰে অতি সোনকালে আলোচনাৰ মাজৰে জনগোষ্ঠীটোৰ দীৰ্ঘ দিনীয়া সমস্যাসমুহ সমাধানৰ ব্যৱস্থা নকৰে তেতিয়াহলে  সংগঠনটোৱে এলানি গণ আন্দোলনৰ কাৰ্যসূচী গ্ৰহণৰ কথা সদৰি কৰে । সংবাদ মেলত কমতাপুৰ টেষ্ট ডিমাণ্ড কাউন্সিলৰ মুখ্য সমন্বয়ক লক্ষীন্দ্ৰ ৰায় আৰু উপ সভাপতি তথা আক্ৰাছুৰ সাধাৰণ সম্পাদক সোণাধৰ ৰায়ে কয় যে সংগঠনটোৰ এখন গুৰুত্বপূৰ্ণ সভা যোৱা ২৮ জুলাইত পশ্চিমবংগৰ ময়নাগুৰিত অনুষ্ঠিত হৈ যায় ৷ উক্ত সভাত কেএলঅৰ বর্তমান অবস্থান আৰু পৰিস্থিতি সম্পর্কে বিশেষভাবে আলোচনা হয় ৷ সভাত কেএলঅৰ সভাপতি জীৱন সিংহ কোচক এজন জনপ্ৰিয়, বলিষ্ঠ আৰু অপ্ৰতিৰুদ্ধ নেতা হিচাপে অভিহিত কৰাৰ লগতে তেওঁ যোৱা ২০২৩ চনৰ ১৭ জানুৱাৰীত ভাৰত চৰকাৰৰ আহ্বান মৰ্মে শান্তি আলোচনাৰ বাবে ভাৰত ভূমিত প্ৰৱেশ কৰাৰ আজি ডেৰ বছৰ সময় পাৰ হোৱাৰ পিচতো ৰহস্যজনকভাবে শান্তি আলোচনা পৰিপূৰ্ণ নোহোৱাত বিষয়টোকলৈ ক্ষোভ প্ৰকাশ কৰে ৷ লগতে ভাৰত চৰকাৰৰ গৃহদপ্তৰ, আই বিৰ লগত সাতবাৰকৈ আলোচনা হৈ যোৱাৰ পিচতো গৃহমন্ত্ৰী বা প্ৰধানমন্ত্ৰী পৰ্যায়ৰ আলোচনাৰ আহ্বান নকৰিলে বুলিও কয় ৷ সেয়ে কমতাপুৰ ষ্টেট ডিমাণ্ড কাউন্সিলে অতি সোনকালে ভাৰতৰ প্রধানমন্ত্রী আৰু গৃহমন্ত্রী পর্যায়ৰ আলোচনা আৰম্ভ কৰি সমস্যাসমুহ সমাধান কৰিবলৈ দাবী জনায় ৷ কাৰণ ইতিমধ্যে কেএলঅ (কেএন) ৰ ডি এল কোচে ভাৰত ভূমিত প্রৱেশ কৰি কেএলঅৰ অধ্যক্ষ জীবন সিংহ কোচৰ সৈতে আলোচনাত বহাৰ সন্মতি প্রকাশ কৰিছে ৷ গতিকে কেএলঅৰ অধ্যক্ষ জীবন সিংহ কোচৰ লগত শান্তি আলোচনাৰ ফলপ্রসূ সমাধান কৰিব লাগে বুলিও সংগঠনটোৰ নেতৃত্বই দাবী জনায় ৷ কেএছডিচিয়ে মূলত অসমৰ অবিভক্ত গোৱালপাৰা জিলাৰ ৫ খন জিলা ক্ৰমে গোৱালপাৰা, ধুবুৰী , কোকৰাঝাৰ, বঙাইগাঁও আৰু চিৰাঙৰ লগতে পশ্চিমবংংগৰ উত্তৰ খণ্ডৰ ৮ খন জিলা আলিপুৰ, কোচবিহাৰ, দার্জিলিং, জলপাইগুৰি, কালিংপং, উত্তৰ দিনাজপুৰ, দক্ষিণ দিনাজপুৰ আৰু মালদা, বিহাৰৰ পূর্ণিয়া, কিষাণগঞ্জ আৰু কাটিহাৰকলৈ পৃথক কমতাপুৰ ৰাজ্য পুনৰ গঠন কৰা, কোচ ৰাজবংশী জনগোষ্ঠীক অনুসূচিত জনজাতি (এছটিপি ) হিচাপে অন্তর্ভুক্ত কৰা, ৰাজবংশী বা কামতাপুৰী ভাষাক সংবিধানৰ অষ্টম সূচীত অন্তর্ভুক্ত কৰা, কেএলঅৰ সমূহ সদস্যক সাধাৰণ ৰাজক্ষমা প্ৰদান কৰা আৰু কেএলঅৰ সদস্যসকলক পুনৰ পূৰ্বৰ সুস্থ অৱস্থালৈ অনাৰ বাবে পুনৰ সংস্থাপন দিয়াকে ধৰি পাঁচটা  দাবীৰ ভিত্তিত চলি থকা আলোচনাৰ শীঘ্ৰে সমাধান সূত্ৰ উলিওৱাৰ দাবী উত্থাপন কৰে । লগতে উপৰোক্ত দাবীসমূহ যদি জীৱন সিংহৰ লগত শান্তি আলোচনাৰ মাধ্যমত পূৰণ নহয়, তেতিয়াহলে অহা ১৫ আগষ্টৰ ভিতৰত কেএছডিচিয়ে গণ আন্দোলন গঢ়ি তোলাৰ লগতে ৰাষ্ট্ৰীয় ঘাই পথ বন্ধ, ৰে'ল অৱৰোধ, অসম, বেংগল আৰু বিহাৰ বন্ধৰ দৰে কাৰ্যসূচী গ্ৰহণ কৰিবলৈ বাধ্য হ'ব বুলিও ভাৰত চৰকাৰক সকিয়াই দিয়ে ৷ সেইদৰে আন্দোলনৰ দৰে কাৰ্যসূচী গ্ৰহণ কৰাৰ ফলত সৃষ্টি হ’ব পৰা যিকোনো পৰিস্থিতিৰ বাবে শাসকীয় চৰকাৰে সম্পূৰ্ণ জগৰীয়া হ’ব বুলি সংবাদ মেলত উপস্থিত নেতৃবৰ্গই কয় ৷ 

ইফালে ৰূপসী বিমান বন্দৰৰ নাম সলনি কৰাৰ বাবে ৰাজ্য চৰকাৰে কেবিনেটত লোৱা সিদ্ধান্তৰ তীব্ৰ বিৰোধ কৰে সংগঠনটোৱে ৷ সংগঠনৰ নেতৃবৰ্গই কয় যে কোচ ৰাজবংশী জনগোষ্ঠীৰ জমিদাৰ যতীন্দ্ৰ নাৰায়ণ চৌধুৰীয়ে ৩৫০০ বিঘা ভূমি দান কৰিছিল ৷ সেইমতে যতীন্দ্ৰ নাৰায়ণ চৌধুৰীৰ পত্নী ৰূপহী বা ৰূপছী হিচাপে নামাকৰণ কৰি দ্বিতীয় বিশ্ব যুদ্ধৰ সময়ত বিমান বন্দৰটোৰ নিৰ্মাণ কৰি উলিয়াইছিল ৷ সেয়ে কোচ ৰাজবংশী সকলৰ আৱেগ অনুভূতিৰ সৈতে জড়িত হৈ থকা বিমান বন্দৰটোৰ নামাকৰণ সলনি কৰি চৰকাৰক জনগোষ্ঠীটোৰ ইতিহাস বিলুপ্তিৰ ষড়যন্ত্ৰত হাত উজান নিদিবলৈ সংগঠনটোৱে আহ্বান জনায় । উল্লেখ্য যে অসম আৰু পশ্চিম বংগৰ ২৮ টাকৈ দল- সংগঠনৰ উমৈহতীয়া মঞ্চ কমতাপুৰ ষ্টেট ডিমাণ্ড কাউঞ্চিলৰ এই সংবাদ মেলত সংগঠনটোৰ কেন্দ্ৰীয় সমিতিৰ আহ্বায়ক নিত্যানন্দ অধিকাৰী , মুকুট ৰায় , প্ৰফুল্ল ৰায় , কোচ ৰাজবংশী সমাজৰ বঙাইগাঁও জিলা সমিতিৰ সম্পাদক সঞ্জয় ৰায় প্ৰমুখ্য কৰি নেতৃবৰ্গ উপস্থিত থাকে ৷ ইপিনে ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাই শেহতীয়াভাৱে অবিভক্ত গোৱালপাৰা জিলাৰ ভূমি এটা বিশেষ সম্প্ৰদায়ৰ ওচৰত বিক্ৰী কৰিবলৈ নোৱাৰিব আৰু এই ক্ষেত্ৰত এখন আইন আনিব বুলি কৰা মন্তব্যক অবিভক্ত গোৱালপাৰা জিলা কোচ ৰাজবংশী ভূমি সংগ্ৰাম সমিতিৰ সভাপতি লক্ষীন্দ্ৰ ৰায়ে আদৰণি জনাইছে ৷ লগতে কেৱল সেই বিশেষ সম্প্ৰদায়কে নহয়, যাতে কোনো সম্প্ৰদাৰ ওচৰতে বিক্ৰী কৰিব নোৱাৰে তাৰ বাবে এটা বেল্ট এণ্ড ব্লকৰ ব্যৱস্থা কৰিবলৈকো দাবী জনায় ৷🔯