🔯বঙাইগাঁও জিলা উন্নয়ন সমিতিৰ আগষ্ট মাহৰ সভা সম্পন্ন🔯

🔯বঙাইগাঁও জিলা উন্নয়ন সমিতিৰ আগষ্ট মাহৰ সভা সম্পন্ন🔯

📝বঙাইগাঁওঃ ৬ আগষ্ট: বঙাইগাঁও জিলা উন্নয়ন সমিতিৰ আগষ্ট মাহৰ সভাখন মঙলবাৰে জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়। জিলা আয়ুক্ত নৱদ্বীপ পাঠকৰ সভাপতিত্বত অনুষ্ঠিত সভাত জিলা আয়ুক্তগৰাকীয়ে অমৃত বৃক্ষ আন্দোলনৰ নিৰ্ধাৰিত লক্ষ্যত উপনীত হোৱাৰ ক্ষেত্ৰত সংশ্লিষ্ট সকলো বিভাগে নিজৰ নিজৰ কৰণীয়খিনি সময়মতে যাতে কৰে তাৰ বাবে নিৰ্দেশ দিয়ে। জিলা আয়ুক্তগৰাকীয়ে  বিদ্যালয়সমূহৰ পৰিদৰ্শকক কয় যে কোনো স্কুলতে যাতে কোনোদিনে মধ্যাহ্ন ভোজন নিদিয়াকৈ নাথাকে। আনহাতে পঞ্চায়ত আৰু গ্ৰামোন্নয়ন বিভাগৰ বিষয়াসকলক কয় যে প্ৰধানমন্ত্ৰী আৱাস যোজনাৰ গৃহ আবন্টন দিয়াৰ ক্ষেত্ৰত যাতে ভূমি সম্পৰ্কত ভালদৰে চাই-চিটি লয় আৰু সকলো প্ৰধানমন্ত্ৰী আৱাস যোজনাৰ গৃহতে যাতে অনাময় শৌচাগাৰ, বিদ্যুত, জল জীৱন মিছনৰ পানী আৰু ৰাষ্ট্ৰীয় খাদ্য সুৰক্ষাৰ ৰেচন কাৰ্ড উপলব্ধ হোৱাটো নিশ্চিত কৰে। সেইদৰে জিলা পৰিবহন বিষয়াক কয় যে কোনো কাৰণতে যাতে ৰাজহ সংগ্ৰহ কমি নাযায়। 

আনহাতে জিলা সমাজ কল্যাণ বিষয়াক জিলা আয়ুক্তগৰাকীয়ে কয় যে প্ৰতিটো অংগনাৱাদী কেন্দ্ৰতে যাতে অন্তত মাহটোৰ ভিতৰত একৈশ দিন পুষ্টিকৰ খাদ্য যোগান ধৰাটো নিশ্চিত কৰে। জিলা উন্নয়ন সমিতিৰ সভাত জিলা উন্নয়ন আয়ুক্ত ধ্ৰুৱজ্যোতি দাসে কয় যে এই বছৰো খেল মহাৰণ অনুষ্ঠিত হ'ব। এই বছৰত দবা, চাইক্লিং আদি খেলো খেল মহাৰণত অন্তৰ্ভুক্ত কৰা হৈছে।গতিকে প্ৰাৰম্ভিক প্ৰস্তুতি চলাবলৈ জিলা ক্ৰীড়া বিষয়াক তেওঁ আহ্বান জনায়। একেদৰে জিলা কৃষি বিষয়াক কয় যে তেওঁ যাতে কৃষি বিভাগৰ পি এম কিষাণ, আধাৰ সংযোগ আদি আন আঁচনিৰ লগতে নিম্নতম সমৰ্থিত মূল্যত ধান ক্ৰয় প্ৰক্ৰিয়াতো সমানে গুৰুত্ব আৰোপ কৰে। তেওঁ যোগান বিভাগৰ বিষয়াক অন্ন সেৱা সপ্তাহ, ই-শ্ৰম আৰু আমাৰ দোকান আঁচনিকেইখনত যাতে তেওঁ সমানেই গুৰুত্ব দি চলাই যাবলৈকো কয় ৷

ইপিনে জিলা উন্নয়ন সমিতিৰ সভাত স্বাস্থ্য বিভাগৰ পৰা মুখ্যমন্ত্ৰীৰ বিনামূলীয়া ডায়েগনোচিছ আঁচনিখন বঙাইগাঁও জিলাত ভালদৰে চলি থকাৰ লগতে গৰ্ভৱতী মাতৃৰ প্ৰসৱপূৰ্ৱক চাৰিটা পৰীক্ষা নিয়মিতভাৱে চলি থকা বুলি জনায় ৷ লগতে এই মাহত কোনো প্ৰসূতি মাতৃৰ মৃত্যু নোহোৱা বুলিও জনায় ৷ আনহাতে জিলা শ্ৰম বিষয়াই জনায় যে অসম পৰিবহণ কৰ্মচাৰী সামাজিক নিৰাপত্তা আঁচনিখনৰ ভিতৰত ১৮ বছৰৰ পৰা ৬০ বছৰ বয়সৰ কৰ্মচাৰীক সামৰি লোৱা হৈছে।তেওঁলোকৰ মৃত্যু হ’লে, আঘাতপ্ৰাপ্ত হ’লে আৰু বেমাৰ হ’লে  এই আঁচনিখনৰ অধীনত সাহায্যৰ ব্যৱস্থা আছে ৷ সভাত জিলা পৰিষদৰ মুখ্য কাৰ্যবাহী বিষয়া অনুপম ডেকা, অতিৰিক্ত জিলা আয়ুক্ত ডিম্পী গগৈ আৰু সুজাতা গগৈৰ লগতে অন্যান্য বিভাগৰ বিষয়াসকল উপস্থিত থাকে।🔯