🔯বঙাইগাঁৱত অমৃত বৃক্ষ আন্দোলন-২০২৪ ৰ শুভাৰম্ভণি🔯

🔯বঙাইগাঁৱত অমৃত বৃক্ষ আন্দোলন-২০২৪ ৰ শুভাৰম্ভণি🔯 

জিলাখনত দহ লাখ পঞ্চাশ হেজাৰ ডাল গছপুলি ৰোপনৰ লক্ষ্য

📝বঙাইগাঁওঃ ১ আগষ্টঃ সমগ্ৰ ৰাজ্যৰ লগতে বঙাইগাঁও জিলাতো বৃহস্পতিবাৰে "অমৃত বৃক্ষ আন্দোলন ২০২৪" আঁচনিখন শুভাৰম্ভ কৰা হয়  ৷ আঁচনিখন বঙাইগাঁৱৰ বীৰঝৰা ছোৱালী উচ্চতৰ মাধ্যমিক বিদ্যালয় চৌহদত আনুষ্ঠানিকভাৱে শুভ উদ্বোধন কৰা হয় ৷  এই উপলক্ষ্যে জিলা উন্নয়ন আয়ুক্ত ধ্ৰুৱজ্যোতি দাসৰ সভাপতিত্বত এখন সভা অনুষ্ঠিত কৰা হয়। সভাত ভাষণ প্ৰদান কৰি জিলা উন্নয়ন আয়ুক্ত দাসে কয় যে এই বছৰ জিলাখনত দহ লাখৰ পৰা প্ৰায় দহ লাখ পঞ্চাশ হেজাৰডাল গছপুলি ৰোপনৰ লক্ষ্য স্থিৰ কৰি লোৱা হৈছে।জিলাখনৰ আই উপত্যকা বন-সংমণ্ডল, কৃষি বিভাগ, স্বাস্থ্য, বিদ্যালয়-মহাবিদ্যালয়, আৰক্ষী, উন্নয়ন খণ্ড, অসম ৰাজ্যিক গ্ৰামীণ জীৱিকা অভিযান, গাঁও-পঞ্চায়ত, মহিলা আৰু শিশু বিকাশ, পৌৰসভা আদিকৰি বিভিন্ন বিভাগৰ সহযোগত নিৰ্ধাৰিত লক্ষ্যত উপনীত হ'ব পৰা যাব বুলি আশা কৰা হৈছে বুলিও তেওঁ কয়। প্ৰাকৃতিক ভাৰসাম্য ৰক্ষাৰ উদ্দেশ্য আগত ৰাখিয়েই অমৃত বৃক্ষ আন্দোলন আঁচনিখন হাতত লোৱা বুলিও জিলা উন্নয়ন আয়ুক্ত দাসে কয়। তদুপৰি "এজোপা গছ মাৰ নামত" ৰোপন কৰিবলৈ ভাৰতৰ প্ৰধানমন্ত্ৰী নৰেন্দ্ৰ মোদীৰ যি আহ্বান সেই আহ্বানৰ প্ৰতি সন্মান জনাই সকলোকে নিজৰ মাৰ নামত একোজোপা গছপুলি ৰুবলৈ জিলা উন্নয়ন আয়ুক্ত ধ্ৰুৱজ্যোতি দাসে অনুৰোধ জনায়। তেওঁ আৰু কয় যে গছপুলি ৰুলেই নহ’ব, গছপুলিটোৰ যত্নও ল'ব লাগিব যাতে গছপুলিটো ৰোপনৰ উদ্দেশ্য সফল হয় ৷ আই উপত্যকা বন-সংমণ্ডল প্ৰাধিকাৰী খনীন্দ্ৰ কলিতাই সভাৰ উদ্দেশ্য ব্যাখ্যা কৰা সভাত বঙাইগাঁও পৌৰসভাৰ পৌৰপতি সুবোধ চন্দ্ৰ দাসেও বক্তব্য ৰাখে। নগৰীয়া গ্ৰামীণ জীৱিকা অভিযানৰ জিলা প্ৰকল্প বিষয়া সঞ্জীৱ দাসে আঁত ধৰা সভাত বীৰঝৰা ছোৱালী উচ্চতৰ মাধ্যমিক বিদ্যালয়ৰ ছাত্ৰীসকলে সমবেত সংগীত পৰিৱেশন কৰে ৷

আঁচনিখনৰ শুভাৰম্ভণি অনুষ্ঠানত অতিৰিক্ত জিলা আয়ুক্ত সুজাতা গগৈ, সহকাৰী আয়ুক্ত মূৰ্চ্ছনা মালাকাৰ, যুটীয়া স্বাস্থ্য সেৱা সঞ্চালক বলেন্দ্ৰ নাৰায়ণ ডেকা, অসম গ্ৰামীণ জীৱিকা অভিযানৰ জিলা প্ৰকল্প বিষয়া প্ল'ৰাজ মুছাহাৰী, জিলাৰ উপ-আৰক্ষী অধীক্ষক, জ্যেষ্ঠ নাগৰিকৰ লগতে বীৰঝৰা ছোৱালী উচ্চতৰ মাধ্যমিক বিদ্যালয়ৰ শিক্ষক-শিক্ষয়িত্ৰীসকল উপস্থিত থাকে। সভাৰ শেষত উক্ত বিদ্যালয়ৰ চৌহদত জ্যেষ্ঠ নাগৰিক, জিলা উন্নয়ন আয়ুক্ত, পৌৰপতি, আই উপত্যকা বন-সংমণ্ডলৰ প্ৰাধিকাৰী আদিকৰি কেবাজনো লোকে গছপুলি ৰোপন কৰে। উল্লেখ্য যে অসমৰ মুখ্যমন্ত্ৰী ডঃহিমন্ত বিশ্ব শৰ্মাই যোৱা বছৰ " অমৃত বৃক্ষ আন্দোলন" আঁচনিখন আৰম্ভ কৰিছিল ৷🔯