🔯পূৰ্বৰ প্ৰফুল্ল মহন্ত নেতৃত্বাধীন অসম চৰকাৰৰ দুমুখীয়া নীতিৰ বাবেই কোচ-ৰাজবংশীৰ জনজাতিকৰণ নহ'ল

🔯পূৰ্বৰ প্ৰফুল্ল মহন্ত নেতৃত্বাধীন অসম চৰকাৰৰ দুমুখীয়া নীতিৰ বাবেই কোচ-ৰাজবংশীৰ জনজাতিকৰণ নহ'ল

News4Bongaigaon: কোচ ৰাজবংশী জনগোষ্ঠীৰ স্বগোষ্ঠী জনপ্রতিনিধি আৰু পূৰ্বৰ প্ৰফুল্ল মহন্ত নেতৃত্বাধীন অসম চৰকাৰৰ দুমুখীয়া নীতিৰ বাবে আজি পর্যন্ত নিৰন্তৰভাৱে সংগ্ৰাম চলাই অহাৰ পাছতো জনজাতিকৰণ নহ'ল কোচ-ৰাজবংশী জনগোষ্ঠীটোৰ। এই অভিযোগ আন্তঃৰাষ্ট্ৰীয় কোচ-ৰাজবংশী সন্থাৰ সভাপতি ভদ্ৰেশ্বৰ বৰ্মন আৰু কমতাপুৰী উন্নয়ন সমিতিৰ সম্পাদক বুদ্ধদেৱৰ ৰায়ৰ। সংবাদ মাধ্যমলৈ প্রেৰিত এক প্ৰেছ বিবৃতিত নেতাদ্বয়ে কয় যে, প্ৰতিখন ৰাজ্য চৰকাৰে নিৰ্বাচনৰ প্ৰাকমূহুৰ্তত অসমৰ ভূমিপুত্ৰ কোচ  ৰাজবংশী জনগোষ্ঠীক জনজাতিকৰণ কৰা হ'ব বুলি প্ৰতিশ্ৰুতিৰ বন্যা বোৱাই ভোট আদায় কৰি আহিছে। কিন্তু  নির্বাচনী বৈতৰণী পাৰ হোৱাৰ পাছতে জনগোষ্ঠীটোৰ প্ৰাপ্য অধিকাৰলৈ পিঠি দি জনজাতিকৰণৰ দীৰ্ঘদিনীয়া দাবী ওলোমাই থয়৷ উল্লেখ্য যে ১৯৯৬ চনত কেন্দ্ৰত থকা কংগ্ৰেছ চৰকাৰে কোচ-ৰাজবংশী জনগোষ্ঠীটোক মহামহিম ৰাষ্ট্ৰপতিৰ এক অধ্যাদেশৰ জৰিয়তে জনজাতিকৰণৰ মৰ্যাদা দিছিল ৷সেই মতে জনগোষ্ঠীটোৱে প্ৰাপ্য মৰ্য্যাদাও আদায় কৰি স্বস্তিৰ নিশ্বাস পেলায়। সেই সময়ত ৰাজ্যত থকা অ.গ.প চৰকাৰৰ দুমুখীয়া নীতি প্ৰয়োগ কৰাত পুনৰাই জনজাতিকৰণৰ পৰা বঞ্চিত হ'বলগীয়া হ'ল কোচ-ৰাজবংশী জনগোষ্ঠীটো। সেই সময়ত অগপ দলৰ মন্ত্ৰী দিগেন বৰা, ফণীভূষণ চৌধুৰী, বিধায়ক ভূপেন ৰায়, মোহন দাসকে ধৰি যিসকল কোচ-ৰাজবংশী জনগোষ্ঠীৰ মন্ত্ৰী-বিধায়ক আছিল তেওঁলোকেও দুমুখীয়া নীতি গ্ৰহণ কৰা বাবে জনজাতিকৰণৰ পৰা বঞ্চিত হ'ল জনগোষ্ঠীটো। অধ্যাদেশখন আইনত পৰিণত কৰাৰ বাবে নতুন দিল্লীত হেঁচা প্ৰয়োগ কৰাটো দূৰৰে কথা অধ্যদেশখন নবীকৰণৰ ক্ষেত্ৰত তদানীন্তন মুখ্যমন্ত্ৰী প্ৰফুল্ল মহন্ত নেতৃত্বাধীন অসম চৰকাৰে কোনো গুৰুত্বই নিদিলে পঞ্চমবাৰৰ বাবে অধ্যাদেশখন নৱীকৰণৰ ক্ষেত্ৰতো বুলি অভিযোগ উত্থাপন কৰে ৷ ফলত জনগোষ্ঠীটো প্ৰাপ্য অধিকাৰৰ পৰা বঞ্চিত হ'ল। এই বিষয়ে টিএডি/এছটি/৫৯/৯৭/৫,তাৰিখ ১৭/৩/১৯৯৭ এখন পত্ৰৰ জৰিয়তে কোচ-ৰাজবংশী জাতিটোক জনজাতিকৰণ কৰিব নালাগে বুলিহে প্ৰতিবেদন প্ৰেৰণ কৰে ৷ ফলত জনগোষ্ঠীটো জনজাতিকণৰৰ পৰা বঞ্চিত হয়। এই ক্ষেত্ৰত কোচ-ৰাজবংশী অধ্যুষিত দুটাকৈ সমষ্টি ক্ৰমে বঙাইগাঁও সমষ্টিৰ প্ৰাক্তন বিধায়ক তথা বৰ্তমানৰ সাংসদ ফণীভূষণ চৌধুৰী উত্তৰ অভয়াপুৰীৰ প্ৰাক্তন বিধায়ক ভূপেন ৰায়ৰ ভূমিকাও আছিল খুবেই ৰহস্যজনক। কোচ-ৰাজবংশী জনগোষ্ঠীৰ স্বগোষ্ঠীয় নেতা হোৱাৰ পাছতো কোচ-ৰাজবংশী জনগোষ্ঠীক জনজাতিকৰণৰ ক্ষেত্ৰত কোনো পদক্ষেপ নোলোৱাটোৱেই আছিল জাতিটোৰ বাবে দুৰ্ভাগ্যজনক। এই বিষয়ে ১৯৯৭ চনতেই আক্ৰাছুৱে অগপ চৰকাৰৰ ভূমিকাক লৈ ক্ষোভ প্ৰকাশ কৰা পৰিলক্ষিত হৈছে। উল্লেখ্য, কোনো ৰাজ্যৰ কোনো এক জনগোষ্ঠীক জনজাতিকৰণৰ আওতালৈ অনাৰ ক্ষেত্ৰত সেই ৰাজ্যক ৰাজ্য চৰকাৰে গুৰুত্বপূৰ্ণ ভূমিকা গ্ৰহণ কৰিব লাগে। ৰাজ্য চৰকাৰে জনগোষ্ঠীটোৰ জনজাতিকৰণ প্ৰক্ৰিয়া আৰম্ভ কৰি কেন্দ্ৰীয় চৰকাৰলৈ সৰ্বসন্মত প্ৰস্তাৱ প্ৰেৰণ কৰিব লাগে। নেতাদ্বয়ে বিবৃতিটোত উল্লেখ কৰা মতে ৰাজ্যই প্ৰেৰণ কৰা প্ৰস্তাৱৰ ওপৰত ভিত্তি কৰিয়েই কেন্দ্ৰই জনগোষ্ঠীটোৰ জনজাতিকৰণৰ ক্ষেত্ৰত ব্যৱস্থা গ্রহণ কৰে। তেনেস্থলত ৰাজ্য চৰকাৰে কোচ-ৰাজবংশী জনগোষ্ঠীটো জনজাতিকৰণৰ প্ৰক্ৰিয়া আগবঢ়াই লোৱাৰ সলনি কেন্দ্ৰীয় চৰকাৰক সমস্ত দোষ জাপি দিয়াৰ আৰত ৰাজ্য চৰকাৰৰ দুমুখীয়া নীতি বুলিহে অভিযোগ কৰিছে নেতাদ্বয়ে। এনে স্থলত বৰ্তমানৰ মুখ্যমন্ত্রী ড° হিমন্ত বিশ্ব শর্মা নেতৃত্বাধীন বিজেপি চৰকাৰে কোচ-ৰাজবংশী জনগোষ্ঠীক জাতিকৰণৰ ক্ষেত্ৰত সর্বসন্মত প্ৰস্তাৱ গ্ৰহণ কৰি কেন্দ্ৰলৈ প্ৰেৰণ কৰিবলৈ দাবী জনায় আন্তঃৰাষ্ট্ৰীয় কোচ-ৰাজবংশী সন্থাৰ সভাপতি ভদ্ৰেশ্বৰ বৰ্মন আৰু কমতাপুৰী উন্নয়ন সমিতিৰ সম্পাদক বুদ্ধদেৱৰ ৰায়ে ।