🔯কোচ ৰাজবংশী সাহিত্য সভা নামত সাহিত্য সভা যদিও জনগোষ্ঠীটোৰ ভাষা-সাহিত্য চৰ্চা আদিৰ বাবে আজিলৈকে একো কাম কৰা নাই - জাতীয় পৰিষদ🔯

🔯কোচ ৰাজবংশী সাহিত্য সভা নামত সাহিত্য সভা যদিও জনগোষ্ঠীটোৰ ভাষা-সাহিত্য চৰ্চা আদিৰ বাবে আজিলৈকে একো কাম কৰা নাই - জাতীয় পৰিষদ🔯 

🔯চেপ্তেম্বৰত গঠন হ'ব কোচ ৰাজবংশী ভাষা-সাহিত্যৰ এক নতুন জাতীয় অনুষ্ঠান🔯

📝বঙাইগাঁও: ২৯ আগষ্ট: কোচ ৰাজবংশী জনগোষ্ঠীৰ অন্যতম জাতীয় সংগঠন কোচ ৰাজবংশী জাতীয় পৰিষদৰ সভাপতি বিমল কুমাৰ বৰ্মনৰ সভাপতিত্ব কোচ ৰাজবংশী জাতীয় পৰিষদৰ এখন বৰ্দ্ধিত কাৰ্যনিৰ্বাহ সভা সোমবাৰে চিৰাং জিলাৰ বিজনী চহৰস্থিত ঐতিহাসিক বুঢ়ীঠাকুৰাণী মন্দিৰৰ প্ৰেক্ষাগৃহত অনুষ্ঠিত হয়। কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে উদ্দেশ্য বাখ্যা কৰা কাৰ্যনিৰ্বাহক সভাই কেইবাটাও বৌদ্ধিক আৰু শৈক্ষিক প্ৰস্তাৱ গ্ৰহণ কৰে ৷ সভাত গৃহীত কৰা বৌদ্ধিক আৰু শৈক্ষিক প্ৰস্তাৱ সমূহ পিচত  সংবাদমেলৰ জৰিয়তে প্ৰকাশ কৰে। কোচ ৰাজবংশী জাতীয় পৰিষদৰ সভাপতি বিমল কুমাৰ বৰ্মন আৰু সাধাৰণ সম্পাদক বিশ্বজিৎ ৰায়ে সংবাদমেল যোগে কয় যে কোচ ৰাজবংশীৰ মান্যভাষা আৰু লিপি আলোচনা চক্ৰ আৰু বিজ্ঞান সন্মতভাবে গ্ৰহণ কৰাৰ বাবে গঠিত কোচ ৰাজবংশী ভাষা আহ্বায়ক কমিটিয়ে যোৱা ২৭ আৰু ২৮ আগষ্টত বঙাইগাঁও জিলা পুথিভঁৰালত ৰাজ্যিক পৰ্য়ায়ৰ আলোচনা চক্ৰ অনুষ্ঠিত কৰি কোচ ৰাজবংশী জনগোষ্ঠীৰ মান্যভাষাক "কোচ ৰাজবংশী" হিচাবে আৰু অসমীয়া লিপিক কোচ ৰাজবংশী ভাষাৰ লিখিত ৰূপৰ লিপি হিচাবে গ্ৰহণ কৰা সিদ্ধান্ত যুগান্তৰকাৰী সিদ্ধান্ত বুলি আদৰণি জনায়। ইপিনে কোচ ৰাজবংশী জাতীয় পৰিষদে কোচ ৰাজবংশী সাহিত্য সভাক কটু সমালোচনা কৰি কয় য়ে কোচ ৰাজবংশী সাহিত্য সভা নামত সাহিত্য সভা যদিও কোচ ৰাজবংশী সকলোৰ ভাষা-সাহিত্য চৰ্চা, গৱেষণা, সম্প্ৰসাৰ, অধ্যায়ণ আদিৰ বাবে আজিলৈকে কাম নকৰি আকোৰগোঁজ মনোভাবেৰে কিছুমান বিতৰ্কিত সিদ্ধান্তৰে জাতিগোষ্ঠীটোক অৱদমিত কৰা হে দেখা পোৱা গৈছে ৷ গতিকে কোচ ৰাজবংশী জনগোষ্ঠীৰ ভাষা, কৃষ্টি, সংস্কৃতিৰ উন্নয়ন, বিকাশ, অধ্যয়ন আৰু গৱেষণা কৰাৰ স্বাৰ্থত অহা চেপ্তেম্বৰ মাহৰ ভিতৰতে বঙাইগাঁও চহৰ নতুবা বিজনী চহৰত এখন অভিৱৰ্তনৰ আহ্বান কৰি কোচ ৰাজবংশী ভাষা-সাহিত্যৰ এক জাতীয় সংগঠন (অনুষ্ঠান) গঠন কৰাৰ বাবে সভাই সিদ্ধান্ত গ্ৰহণ কৰে বুলিও কয় ৷ সেই দৰে প্ৰাথমিক বিদ্যালয়ৰ "ক" শ্ৰেণীৰ পৰা "পঞ্চম" শ্ৰেণীলৈ  অসম চৰকাৰে ৰাষ্ট্ৰীয় শিক্ষানীতিৰ আধাৰত অসমৰ সকলো জাতি-জনগোষ্ঠীৰ মাতৃ ভাষাৰ ওপৰত শিক্ষাদানৰ সিদ্ধান্তক কোচ ৰাজবংশী জাতীয় পৰিষদে আদৰণি জনাই প্ৰাথমিক বিদ্যালয়ত কোচ ৰাজবংশী ভাষাত পাঠদানত উপযোগী হোৱাকৈ উপযুক্ত পাঠ্যপুথি প্ৰণয়ন আৰু প্ৰকাশ কৰাৰ বাবে বিমল কুমাৰ বৰ্মনক অধ্যক্ষ আৰু নৃপেন ৰায়ক মুখ্য আহ্বায়ক হিচাবে লৈ ৩১ জনীয়া আহ্বায়ক কমিটি গঠন কৰা হয়। কোচ ৰাজবংশী জাতীয় পৰিষদে প্ৰাথমিক বিদ্যালয়ত কোচ ৰাজবংশী ভাষাৰ পাঠদানত উপযোগী হোৱাকৈ উপযুক্ত শিক্ষক- শিক্ষয়িত্ৰী গঢ়ি তুলিবলৈ চলিত শিক্ষাবৰ্ষৰ পৰাই বিজনী চহৰস্থিত নৱৰত্ন একাডেমী, মানিকপুৰ, অভয়াপুৰী, বইটামাৰী, চাপৰ, বঙাইগাঁও, বাসুগাওঁ, কোকৰাঝাৰ, শক্তিআশ্ৰম আৰু বিলাসীপাৰা আদি ঠাইত কোচ ৰাজবংশী ভাষাৰ ওপৰত চাৰ্টিফিকেট পাঠ্যক্ৰম আৰম্ভ কৰাৰ বাবে কোচ ৰাজবংশী জাতীয় পৰিষদে সিদ্ধান্ত লয় বুলিও সংবাদ মেলত কোচ ৰাজবংশী জাতীয় পৰিষদৰ সভাপতি আৰু সাধাৰণ সম্পাদকে সদৰি কৰে  ৷🔯