🔯বঙাইগাঁৱত ৰাষ্ট্ৰীয় ক্ৰীড়া দিৱস উপলক্ষ্যে ক্ৰীড়া প্ৰতিযোগিতা🔯

🔯বঙাইগাঁৱত ৰাষ্ট্ৰীয় ক্ৰীড়া দিৱস উপলক্ষ্যে ক্ৰীড়া প্ৰতিযোগিতা🔯 

📝বঙাইগাঁওঃ ২৯ আগষ্টঃ বঙাইগাঁও জিলা প্ৰশাসনৰ উদ্যোগত আৰু বঙাইগাঁও ক্ৰীড়া সংস্থাৰ সহযোগত সোমবাৰে ৰাষ্ট্ৰীয় ক্ৰীড়া দিৱস পালন কৰা হয়। হকীৰ যাদুকৰ মেজৰ ধ্যানচাঁদৰ জন্ম বাৰ্ষিকী উপলক্ষ্যে আয়োজিত ৰাষ্ট্ৰীয় ক্ৰীড়া দিৱস উপলক্ষ্যে বঙাইগাঁও চহৰস্থিত বীৰঝৰা উচ্চতৰ মাধ্যমিক বিদ্যালয় খেলপথাৰত ১০০ মিটাৰ দৌৰ প্ৰতিযোগিতা, ৫০ মিটাৰ দৌৰ প্ৰতিযোগিতা আৰু কুকুৰা যুঁজ প্ৰতিযোগিতা আদি অনুষ্ঠিত কৰা হয়। ক্ৰীড়া প্ৰতিযোগিতাসমূহ আনুষ্ঠানিকভাৱে শুভাৰম্ভ কৰে জিলা উপায়ুক্ত নবদ্বীপ পাঠকে। বীৰঝৰা উচ্চতৰ মাধ্যমিক বিদ্যালয়, বীৰঝৰা ছোৱালী উচ্চতৰ মাধ্যমিক বিদ্যালয়,উত্তৰ বঙাইগাঁও হাইস্কুল আৰু বঙাইগাঁও বিদ্যাপীঠ হাইস্কুলৰ ছাত্ৰ-ছাত্ৰীসকলে এই ক্ৰীড়া প্ৰতিযোগিতাত অংশগ্ৰহণ কৰে। বীৰঝৰা উচ্চতৰ মাধ্যমিক বিদ্যালয়ে এই খেলত শ্ৰেষ্ঠ খেলুৱৈ দল হিচাপে প্ৰতিপন্ন হয় আৰু মেজৰ ধ্যানচাঁদ ট্ৰফী লাভ কৰিবলৈ সক্ষম হয়। 

সেইদৰে এখন ফুটবল খেলো অনুষ্ঠিত কৰা হয় বীৰঝৰা উচ্চতৰ মাধ্যমিক বিদ্যালয় খেল পথাৰত। নৰ্থ বইটামাৰী, দেৱানগাঁও যুৱক সংঘ আৰু খাৰিজা দোলাইগাঁৱৰ গণেশ সংঘই এই ফুটবল খেলত অংশ লয়। এই খেলখনত জিলাখনৰ সুৰজিৎ ভৌমিক, তৰুণ চৌধুৰী, পুপেশ্বৰ ৰায়, মনোৰঞ্জন চৌধুৰী, অনিল বায়ন, মহেশ চৌধুৰী, লোহত ৰায় আৰু মঞ্জুলা চৌধুৰীকে ধৰি কেবাগৰাকীও পূৰ্বৰ ৰাষ্ট্ৰীয় খেলুৱৈক আমন্ত্ৰণ কৰি অনা হয়। উপায়ুক্ত নবদ্বীপ পাঠকে খেলসমূহৰ বিজয়ীসকলক বঁটা আৰু ট্ৰফী প্ৰদান কৰে। উক্ত অনুষ্ঠানত সহকাৰী আয়ুক্ত শিল্পীৰেখা পণ্ডিতো উপস্থিত থাকে৷ ভাৰপ্ৰাপ্ত জিলা ক্ৰীড়া বিষয়া দিবাকৰ মেধি তথা ক্ৰীড়া বিভাগৰ বিষয়ববীয়াই এই খেলসমূহ পৰিচালনা কৰে।🔯