🔯বঙাইগাঁৱত বৃহৎ ভূমি কেলেংকাৰী🔯

🔯বঙাইগাঁৱত বৃহৎ ভূমি কেলেংকাৰী🔯

🔯ভূমিৰ গৰাকীৰ অজ্ঞাতে চহী জাল কৰি মাটি বিক্ৰীঃ তদন্ত কৰিলে জালত পৰাৰ সম্ভাৱনা উপ-পঞ্জীয়ক , মণ্ডল - চক্ৰ বিষয়া🔯 

📝বঙাইগাঁওঃ ২৯ আগষ্টঃ বিভাগীয় চৰকাৰী বিষয়া - কৰ্মচাৰীৰ সহযোগতেই ৰাজ্যৰ বিভিন্ন প্ৰান্তত ভূমি কেলেংকাৰী সংঘটিত হৈ অহাৰ অভিযোগ উত্থাপিত হৈ অহাৰ সময়তে বঙাইগাঁৱতো আন এক বৃহৎ ভূমি কেলংকাৰী পোহৰলৈ আহিছে ৷ ভূমিৰ গৰাকীয়ে নজনাকৈয়ে চহী জাল কৰি বিক্ৰী কৰা হৈছে ভূমি ৷ উপায়ন্তৰ হৈ ভূমিৰ প্ৰকৃত গৰাকীৰ পৰিয়ালৰ লোকে সংবাদ মাধ্যমৰ ওচৰ চাপি সদৰি কৰিলে কেলেংকাৰীৰ তথ্য ৷ এই সন্দৰ্ভত সোমবাৰে বৃহত্তৰ বঙাইগাঁও প্ৰেছ ক্লাবত এক সংবাদ মেল অনুষ্ঠিত কৰি এই ভূমি জালিয়াতিৰ তথ্য সদৰি কৰে ৷ সংবাদ মেলত সদৰি কৰা মতে মালিনী ব্ৰহ্ম নামৰ এগৰাকী মহিলাৰ চহী জাল কৰি বঙাইগাঁও ৰাজহ চক্ৰৰ অধীনত চাপাগুৰি প্ৰথম খণ্ডৰ ৬৪ নং দাগৰ ২ বিঘা ৩ কঠা ১০ লেছা মাটি বিক্ৰী কৰা হৈছে ৷ এই মাটি গৰাকীৰ অজ্ঞাতে বিক্ৰী কৰা হৈছে বুলিও কয় ৷ উল্লেখ্য যে  মালিনী ব্ৰহ্ম নামৰ ভুক্তভোগী মহিলা গৰাকীৰ স্বামী বিনোদ কুমাৰ ব্ৰহ্মই সংবাদ মেলখন আয়োজন কৰে ৷ সংবাদ মেলত তেওঁ জনোৱা মতে প্ৰকাশ শৰ্মা নামৰ এজন ব্যক্তিৰ পৰা তেওঁলোকে ১৯৯৪ চনত এই মাটি ডোখৰ ক্ৰয় কৰি বসবাস কৰিব আৰম্ভ কৰে ৷ মাটিডোখৰ তেওঁলোকৰ দখলতে আছে আৰু তাত ঘৰ - বাৰী আছে, মানুহ থাকে ৷ কিন্তু যোৱা ১৫  জুলাইত ঢালিগাঁৱৰ ইউপিপিএল ৰ নেতা উপেন্দ্ৰ মুছাহাৰী নামৰ ব্যক্তি জনৰ নেতৃত্বত প্ৰায় ১১ - ১২ জনীয়া এটি দলে নিশা প্ৰায় ১১.৩০ বজাত হঠাতে তেওঁলোকৰ এই মাটিত থকা ঘৰৰ চৌহদত প্ৰৱেশ কৰি ব্যাপক উদ্ভণ্ডালি কৰে ৷ এই দলটোৱে ঘৰৰ সীমানাৰ বেৰ ভাঙি বহু সময় ধৰি চলায় সন্ত্ৰাস ৷ লগতে মাটি ডোখৰত তেওঁলোকে থাকিবলৈ দিয়া পৰিয়ালটোক এই বাসস্থান ত্যাগ কৰিবলৈ ধমকি দিয়ে বুলিও অভিযোগ কৰে ৷ এই ঘটনা সংঘটিত হোৱাৰ পাছত বিনোদ কুমাৰ ব্ৰহ্মই বঙাইগাঁও আৰক্ষী অধীক্ষকক জনায় যদিও বঙাইগাঁও আৰক্ষী অধীক্ষকে এই এলেকাটো চিৰাং জিলাৰ অধীনত বুলি জনায় ৷ ইয়াৰ পিছত এই ঘটনাৰ পাছদিনা তেওঁ ঢালিগাঁও থানাত এখন এজাহাৰ দাখিল কৰে ৷ এজাহাৰ দিয়াৰ পিছত এই এজাহাৰখন প্ৰথমে পঞ্জীয়ন কৰা নাছিল আৰক্ষীয়ে ৷ ঢালিগাঁও আৰক্ষী থানাৰ ভাৰপ্ৰাপ্ত আৰক্ষী বিষয়া গৰাকীয়ে জনায় যে এই মাটিৰ মূল নথি পত্ৰ দাখিল কৰাৰ পাছত এজাহাৰখন পঞ্জীয়ন কৰা হ'ব ৷ 

ইয়াৰ পাছত মাটিৰ মূল নথিপত্ৰ জমা দিয়া হয় যোৱা ২৪ আগষ্টত ৷ এই মূল নথিপত্ৰ খিনি জমা দিয়াৰ পাছত ঢালিগাঁও থানাত ১৪৫ /২২  নম্বৰৰ এক গোচৰ পঞ্জীয়ন কৰা হয় ৷ ইপিনে বঙাইগাঁও চক্ৰ বিষয়াৰ কাৰ্যালয়ত এই ভূমিৰ মূল নথি পত্ৰ উলিওৱাৰ সময়তে তেওঁৰ চকুত ধৰা পৰে এক বৃহৎ কেলেংকাৰী ৷ কেলেংকাৰী মতে মালিনী ব্ৰহ্মই বিনীত কুমাৰ জৈনক এই মাটিখিনি বিক্ৰী কৰি পঞ্জীয়ন কৰা দেখুওৱা হৈছে যোৱা ২০১১ চনৰ ২৪ আগষ্টত ৷ অথচ মাটিৰ প্ৰকৃত গৰাকী মালিনী ব্ৰহ্মই এই মাটি বিক্ৰী সন্দৰ্ভত কোনো জ্ঞাত নহয় আৰু কোনো চহীয়ো কৰা নাছিল ৷ গতিকে সেইমতে কোনোৱাই মালিনী ব্ৰহ্মৰ চহী জাল কৰি এই মাটিখিনি বিক্ৰী কৰিছে ৷ ইপিনে জালিয়াতিৰে এই মাটিখিনি বিনীত জৈনে ক্ৰয় কৰি এই মাটিখিনি পাৱাৰ অৱ এটৰ্নী দিছিল হেমৰাজ সুৰানাক ৷ হেমৰাজ সুৰানাই আকৌ এই মাটি ডোখৰ বিক্ৰী কৰে ইউপিপিএল নেতা উপেন্দ্ৰ মুছাহাৰীক ৷ যোৱা ১২ আগষ্টত উপেন্দ্ৰ মুছাহাৰীৰ নামত এই মাটিখিনি পঞ্জীয়ন হোৱা দেখুৱা হৈছে ৷ বিনোদ কুমাৰ ব্ৰহ্মই সদৰি কৰা মতে তেওঁৰ পত্নী বিগত দহ- বাৰ বছৰ ধৰি শাৰীৰিক অসুস্থতাৰ বাবে বিছনাতে পৰি আছে ৷ গতিকে মাটি কৰাৰ কথায়ে নাহে ৷ এতিয়া প্ৰশ্ন হৈছে মাটিৰ প্ৰকৃত গৰাকীৰ অনুপস্থিতত কেনেকৈ মাটি এডোখৰ বিক্ৰী তথা পঞ্জীয়ন কৰা হ'ল এয়া কিন্তু যথেষ্ট চিন্তা কৰিব লগীয়া বিষয় ৷ এই ঘটনাৰ প্ৰকৃত তদন্ত হলে এই কেলেংকাৰী সংঘটিত হোৱাৰ সময়ৰ উপ - পঞ্জীয়ক , বঙাইগাঁও ৰাজহ চক্ৰ বিষয়া তথা উক্ত এলেকাৰ মণ্ডলকে ধৰি এই জালিয়াতিৰে ক্ৰয় কৰা বিনীত জৈন ৰ লগতে আৰু কেবাজনো জালত পৰাৰ সম্ভাৱনা আছে ৷ কাৰণ বিভাগীয় চৰকাৰী বিষয়া - কৰ্মচাৰীৰ সহযোগ অবিহনে দাদাল চক্ৰই ভূমি কেলেংকাৰী সংঘটিত কৰিব নিশ্চয় নোৱাৰে ৷ যদিহে নোৱাৰে তেতিয়াহলে মাটিৰ দালালৰ বিৰুদ্ধে কেৱল অভিযান চলালেই ভূমি কেলেংকাৰী বন্ধ হ'ব নেকি? দাদালৰ লগতে বিভাগীয় বিষয়া - কৰ্মচাৰীসকলৰ বিৰুদ্ধেও চৰকাৰে আৰম্ভ কৰক অভিযান ৷ মাটিৰ দালালক লৈ চৰকাৰে কঠোৰ স্থিতি গ্ৰহণ কৰিলেই নহ'ব ৷ কাৰণ প্ৰকৃততে মাটিৰ দালাল চক্ৰৰ সৈতে উপ - পঞ্জীয়ক, ৰাজহ চক্ৰ বিষয়া তথা লাট ম‌ণ্ডলসকলো জড়িত হৈ থাকে বাবেই ৰাজ্যৰ সৰ্বত্ৰে সংঘটিত হৈ আছে ভূমি কেলেংকাৰী ৷ এতিয়া ভুক্তভোগী পৰিয়ালটোৱে বিচাৰিছে ন্যায় ৷ কিন্তু পাবনে?  এই ভূমি জালিয়াতিৰ সৈতে জড়িতসকলে শাস্তি পাবনে?  উল্লেখ্য যে বঙাইগাঁৱত ইতিমধ্যে  জালিয়াতিৰে আনৰ নামত ভূমি হস্তান্তৰ সম্পৰ্কীয় গোচৰত এগৰাকী উপ পঞ্জীয়ক, নৈশ চকীদাৰ আৰু এজন মহৰী আৰক্ষীৰ দ্বাৰা গ্ৰেপ্তাৰ হৈ ৰঙা ঘৰৰ ভাত খাবলগীয়া হৈছে ৷🔯