🔯সাংবাদিক বনজিৎ ঠাকুৰীয়াক কৰ্তব্যৰত অৱস্থাত দুৰ্বৃত্তৰ আক্ৰমণ🔯

🔯সাংবাদিক বনজিৎ ঠাকুৰীয়াক কৰ্তব্যৰত অৱস্থাত দুৰ্বৃত্তৰ আক্ৰমণ🔯

🔯বঙাইগাঁৱত জাফাৰ উদ্যোগত ক'লা বেজ পৰিধান কৰি সাংবাদিকৰ প্ৰতিবাদ🔯 

🔯মুখ্যমন্ত্ৰীলৈ স্মাৰক পত্ৰ🔯

📝বঙাইগাঁওঃ ৯ ছেপ্টেম্বৰঃ সাংবাদিক বনজিৎ ঠাকুৰীয়াক কৰ্তব্যৰত অৱস্থাত একাংশ দুর্বৃত্তই নির্মমভাবে আক্রমণ কৰা ঘটনাৰ উচিত বিচাৰ তথা এগৰাকী আৰক্ষী বিষয়াৰ পক্ষপাতমূলক আচৰণ আৰু সাংবাদিকৰ নিৰাপত্তা সুনিশ্চিত কৰাৰ দাবীত শুকুৰবাৰে বঙাইগাঁৱতো জাৰ্ণেলিষ্ট এছ’চিয়েছন ফৰ আছাম (জাফা)ৰ উদ্যোগত ক'লা বেজ পৰিধান কৰি সাংবাদিকসকলে প্ৰতিবাদ সাব্যস্ত কৰে ৷ জাফাৰ এই প্ৰতিবাদী কাৰ্যসূচীত বৃহত্তৰ বঙাইগাঁও প্ৰেছ ক্লাবৰ সদস্যসকলেও সহযোগ কৰে ৷ প্ৰতিবাদী কাৰ্যসূচীৰ পিচত জাফাৰ তৰফৰ পৰা বঙাইগাঁও জিলা উপায়ুক্তৰ জৰিয়তে অসমৰ মুখ্যমন্ত্ৰীলৈ এখন স্মাৰকপত্ৰ প্ৰেৰণ কৰে৷ জাৰ্ণেলিষ্ট এছ’চিয়েছন ফৰ আছামৰ (জাফা) সভাপতি অভিদ্বীপ চৌধুৰী ,কাৰ্যকৰী সভাপতি পংকজ ডেকা আৰু সম্পাদক প্ৰধান কুঞ্জমোহন ৰায় স্বাক্ষৰিত স্মাৰকপত্ৰত  উল্লেখ কৰা মতে ৭ ছেপ্তেম্বৰৰ নিশা গুৱাহাটীৰ চান্দমাৰী আৰক্ষী থানাৰ অন্তৰ্গত কমাৰ্চ কলেজৰ সমীপত সংঘটিত অগ্নিকাণ্ডৰ বাতৰি সংগ্ৰহৰ বাবে উক্ত স্থানত উপস্থিত হোৱা সাংবাদিক বনজিৎ ঠাকুৰীয়াক সেই সময়তেই একাংশ দুর্বৃত্তই উপর্যুপৰি প্ৰহাৰ কৰাত মুখমণ্ডলত গুৰুতৰভাৱে আঘাতপ্রাপ্ত হৈছিল ৷ 

উক্ত ঘটনাৰ পিছতেই সাংবাদিক ঠাকুৰীয়াই আৰক্ষীৰ কাষ চাপি অভিযুক্তসকলৰ বিৰুদ্ধে এক এজাহাৰ দাখিল কৰে। কিন্তু দুর্ভাগ্যজনক বিষয় এয়ে যে, আক্রমণৰ ঘটনাৰ সৈতে জড়িত এগৰাকী ব্যক্তিৰ গোচৰৰ ভিত্তিত চান্দমাৰী থানাৰ ভাৰপ্ৰাপ্ত বিষয়াগৰাকীয়ে পক্ষপাতিত্বমূলক ব্যৱহাৰেৰে সাংবাদিক ঠাকুৰীয়াৰ বিৰুদ্ধে গোচৰ ৰুজু কৰি মানসিকভাৱে হাৰাশাস্তি কৰাৰ অভিযোগ উত্থাপিত হৈছে। বিভিন্ন সময়ত বিভিন্ন ব্যক্তিৰ দ্বাৰা বিভিন্ন স্থানত ৰাজ্যৰ চুকে কোণে সাংবাদিক নিগ্ৰহৰ ঘটনা নতুন কথা নহয়। সেয়ে সাংবাদিকৰ নিৰাপত্তা সুনিশ্চিত কৰাৰ দাবী উত্থাপন কৰি সমগ্ৰ ৰাজ্যজুৰি শুকুৰবাৰে “জাফাই ক'লা বেজ পৰিধানেৰে প্রতিবাদ সাব্যস্ত কৰে বুলিও উল্লেখ কৰে ৷ স্মাৰক পত্ৰত সাংবাদিকৰ সুৰক্ষা নিশ্চিত কৰাটো সময়ৰ আহবান বুলি উল্লেখ কৰি এই ক্ষেত্ৰত মুখ্যমন্ত্ৰীক এটা সুদৃঢ় ব্যৱস্থা গ্ৰহণ কৰাৰ লগতে শীঘ্ৰেই নির্যাতিত সাংবাদিক গৰাকীক ন্যায় প্ৰদান কৰাৰ উপৰিও পক্ষপাতিত্বমূলক আচৰণ কৰা আৰক্ষী বিষয়াগৰাকীৰ বিৰুদ্ধে দৃষ্টান্তমূলক ব্যবস্থা গ্রহণ কৰিব বুলি আশা প্ৰকাশ কৰে সংগঠনটোৱে ৷ জিলা উপায়ুক্তক স্মাৰক পত্ৰ প্ৰদানৰ সময়ত জাফাৰ কেন্দ্ৰীয় সভাপতি অভিদ্বীপ চৌধুৰীৰ লগতে জিলা সমিতিৰ বিষয়ববীয়া আৰু সদস্যসকল উপস্থিত আছিল ৷🔯