🔯দুৰ্গা পূজা আয়োজক সমিতিৰে বঙাইগাঁও জিলা প্ৰশাসনৰ সভা🔯

🔯দুৰ্গা পূজা আয়োজক সমিতিৰে বঙাইগাঁও জিলা প্ৰশাসনৰ সভা🔯

🔯প্ৰশাসনৰ নীতি - নিৰ্দেশনাসমূহ মানি চলিবলৈ আহ্বান🔯

📝বঙাইগাঁওঃ ৯ ছেপ্টেম্বৰঃ বঙাইগাঁও জিলা প্ৰশাসনে আগন্তুক দুৰ্গা পূজা উপলক্ষ্যে পূজা আয়োজক সমিতিসমূহৰ বিষয়ববীয়াৰ সৈতে শুকুৰবাৰে এক সভাত মিলিত হয়। উপায়ুক্ত কাৰ্যালয়ৰ সভাকক্ষত অনুষ্ঠিত এই সভাত সভাপতিত্ব কৰে উপায়ুক্ত নবদ্বীপ পাঠকে।জিলাখনৰ আৰক্ষী অধীক্ষক স্বপ্ননীল ডেকা, অতিৰিক্ত উপায়ুক্ত মগেন নৰহ, চক্ৰ বিষয়াসকল, সহকাৰী আয়ুক্ত শিল্পীৰেখা পণ্ডিত, স্বাস্থ্য, লোকনিৰ্মাণ পথ আৰু গৃহ, জনস্বাস্থ্য কাৰিকৰী, অগ্নি নিৰ্বাপক আৰু আপাতকালীন সেৱা, পৰিবহন, চি আৰ পি এফ বাহিনীৰ বিষয়া, বঙাইগাঁও পৌৰসভাৰ পৌৰপতি, অভয়াপুৰী পৌৰসভাৰ কাৰ্যবাহী বিষয়া আৰু দুৰ্গা পূজা কমিটীসমূহৰ সভাপতি আৰু সম্পাদকৰ উপস্থিতিত অনুষ্ঠিত এই সভাত উপায়ুক্ত পাঠকে দুৰ্গা পূজা উদযাপন কৰোতে মানি চলিবলগীয়া নীতি-নিৰ্দেশনাসমূহ উল্লেখ কৰে। তেওঁ কয় যে পূজা কমিটীসমূহে পূজা অনুষ্ঠিত কৰিবলৈ নিয়ম অনুসৰি অনুমতি ল'ব লাগিব। সেইদৰে এ পি ডি চি এলৰ পৰা বিদ্যুৎ সংযোগৰ বাবে অনুমতি, ফটকা ফুটোৱাৰ বাবে পৃথক অনুমতি আৰু ইয়াৰ লগতে বিসৰ্জনৰ দিনা কোন ঠাইত দেৱী বিসৰ্জন দিব সেয়াও অনুমতি বিচৰা আবেদনত উল্লেখ কৰি দিব লাগিব। উপায়ুক্তগৰাকীয়ে পূজা কমিটীসমূহক পূজা মণ্ডপৰ চাৰিওফালে পৰ্যাপ্ত পোহৰৰ ব্যৱস্থা কৰিব লাগিব বুলি কয় ৷ 

বিশেষকৈ দেৱী প্ৰতিমাৰ পিছভাগ যাতে এন্ধাৰ হৈ নাথাকে তাৰ বাবে ব্যৱস্থা ৰাখিব লাগিব বুলি উল্লেখ কৰে। তেওঁ আৰু কয় যে নিশা পূজাৰ মেলা সামৰাৰ পৰা ৰাতিপুৱা পূজা আৰম্ভ নোহোৱালৈকে প্ৰতিমাৰ বাবে নিৰ্দিষ্ট পোহৰাৰ( ৰখীয়া নিযুক্ত কৰি) বাবে মানুহ নিয়োগ কৰিব লাগিব যাতে প্ৰতিমাৰ কোনো দুস্কৃতিকাৰীয়ে হানি-বিঘিনি ঘটাব নোৱাৰে। আনহাতে পূজা মণ্ডপত প্ৰৱেশৰ বাবে পুৰুষ আৰু মহিলাৰ বাবে সুকীয়া প্ৰৱেশ দ্বাৰ আৰু পৰ্যাপ্ত স্বেচ্চাসেৱক নিয়োগ কৰিব লাগিব বুলিও উপায়ুক্ত পাঠকে সভাত উল্লেখ কৰে। আনহাতে পূজা থলীৰ চাৰিওফালে যাতে কোনো দুস্কৃতিকাৰীয়ে অপ্ৰীতিকৰ পৰিস্থিতিৰ সৃষ্টি কৰিব নোৱাৰে বা কৰিব বিচাৰিলেও ধৰা পৰে তাৰ বাবে চি চি টি ভি কেমেৰাৰ ব্যৱস্থা কৰিবলৈ উপায়ুক্তগৰাকীয়ে কমিটীসমূহক আহ্বান জনায়। একেদৰে অগ্নি নিৰ্বাপক সামগ্ৰী যেনে পানী, বালি, ফায়াৰ এক্সিটংগুইচাৰ(Fire Extinguiser) আদি যাতে সকলো পূজা থলীতে ৰাখে তাৰ বাবেও উপায়ুক্তগৰাকীয়ে কমিটীসমূহক পৰামৰ্শ দিয়ে।ইপিনে সভাত আৰক্ষী অধীক্ষক স্বপ্ননীল ডেকাই কয় যে পূজা কমিটীসমূহে যাতে স্বেচ্ছাসেৱক সকলৰ তালিকা আৰক্ষী থানাত জমা দিয়ে । তদুপৰি নিৰ্দ্ধাৰিত সময়ৰ ভিতৰতে যেন দেৱী বিসৰ্জন দিয়ে তাৰ বাবে পূজা কমিটীসমূহক তেওঁ আহ্বান জনায়। বঙাইগাঁও পৌৰসভাৰ পৌৰপতি সুবোধ চন্দ্ৰ দাসে পূজা কমিটীসমূহক পূজাৰ সময়ত চহৰখনৰ লগতে পূজাস্থলীৰ চৌপাশৰ পৰিৱেশ পৰিস্কাৰ পৰিছন্ন কৰি ৰাখিবলৈ আহ্বান জনায়। শেষত উপায়ুক্ত নবদ্বীপ পাঠকে পূজা কমিটীসমূহক শাৰদীয় দুৰ্গা পূজাৰ আগতীয়া শুভেচ্ছা জনায় আৰু নীতি-নিৰ্দেশনাসমূহ পালন কৰি জিলা প্ৰশাসনক সহযোগিতা আগবঢ়াবলৈ আহ্বান জনায়।🔯