🔯বঙাইগাঁৱত অনুষ্ঠিত বিজেপিৰ মহিলা মৰ্চাৰ ৰাজ্যিক কাযনিৰ্বাহক সভাৰ সামৰণি🔯

🔯বঙাইগাঁৱত অনুষ্ঠিত বিজেপিৰ মহিলা মৰ্চাৰ ৰাজ্যিক কাযনিৰ্বাহক সভাৰ সামৰণি🔯

🔯ডিচেম্বৰৰ ভিতৰত গুৱাহাটীত অনুষ্ঠিত কৰিব 'ন বোৱাৰী সন্মিলন'🔯 

🔯কিশোৰী আৰু মহিলাসকলক প্ৰেমৰ ক্ষেত্ৰত সজাগতা সৃষ্টিৰ লগতে বৰ্ধিত জনসংখ্যা নিয়ন্ত্ৰণৰ বিষয়টোত গুৰুত্বাৰোপ🔯

🔯মহিলাসকলক সজাগ কৰাৰ বাবে অনুষ্ঠিত কৰিব সজাগতা সভা🔯

📝বঙাইগাঁওঃ ৪ ছেপ্টেম্বৰঃ ভাৰতীয় জনতা পার্টিৰ অসম প্রদেশ মহিলা মৰ্চাৰ বঙাইগাঁৱত অনুষ্ঠিত দ্বিতীয়খন ৰাজ্যিক কাৰ্যনিৰ্বাহক সভাৰ দেওবাৰে সামৰণি পৰে ৷ বঙাইগাঁও চহৰৰ জিলা পুথিভঁৰাল প্ৰেক্ষাগৃহত দুদিনীয়াকৈ অনুষ্ঠিত ৰাজ্যিক কায্যনিৰ্বাহক সভাৰ দেওবাৰে অনুষ্ঠিত মূল কাৰ্যসূচী অনুসৰি পুৱা দলীয় পতাকা উত্তোলনেৰে কাৰ্যসূচীৰ শুভাৰম্ভ কৰে মহিলা মৰ্চাৰ সভানেত্ৰী আঙুৰলতা ডেকাই ৷ ইয়াৰ পিছতে ভাৰত মাতা, পণ্ডিত দীনদয়াল উপাধ্যায় আৰুডঃ শ্যামা প্ৰসাদ মুখাৰ্জীৰ প্ৰতিচ্ছবিত বন্তি প্ৰজ্বলন কৰি সভানেত্ৰীগৰাকীয়ে শ্ৰদ্ধাঞ্জলি জ্ঞাপন কৰে ৷ কাৰ্যনিৰ্বাহক সভাত অসম ৰাজ্যিক বিজেপিৰ সভাপতি ভৱেশ কলিতা, সাংগঠনিক সাধাৰণ সম্পাদক ফনীন্দ্ৰ নাথ শৰ্মা,সাধাৰণ সম্পাদক পুলক গোঁহাই, কেন্দ্ৰীয় ৰাজ্যিক মন্ত্ৰী ৰামেশ্বৰ তেলী, মন্ত্ৰী ৰঞ্জিত কুমাৰ দাস, মন্ত্ৰী নন্দিতা গাৰ্লোচা, বিধায়িকা সুনম হৰিপ্ৰিয়া আদি উপস্থিত থাকি বিভিন্ন বিষয়ত বক্তব্য ৰাখে ৷ ইপিনে কাৰ্যনিৰ্বাহক সভা সন্দৰ্ভত মহিলা মৰ্চাৰ সভানেত্ৰী আঙুৰলতা ডেকাই কায্যনিৰ্বাহক সভাৰ শেষত সংবাদ মাধ্যমৰ আগত কয় যে এইখন ৰাজ্যিক মহিলা মৰ্চাৰ সাংগঠনিক কায্যনিৰ্বাহক সভা আছিল ৷ সভাত বিগত এবছৰৰ কাম- কাজসমূহৰ খতিয়ানৰ আলোচনা কৰা হয় ৷ লগতে আগন্তুক দিনত কেইটামান কায্যসূচী আছে আৰু সেই বিষয়েও সভাত আলোচনা কৰা হয় ৷ ইয়াৰ ভিতৰত মহিলা মৰ্চাই অহা তিনি মাহৰ ভিতৰত অৰ্থাৎ ডিচেম্বৰৰ ভিতৰত গুৱাহাটীত ১৫ ৰ পৰা ২০ হেজাৰ ন বোৱাৰীক লৈ  এখন 'ন বোৱাৰী ' শীৰ্ষক সন্মিলন অনুষ্ঠিত কৰিব ৷ কাৰণ আমি যদি ভৱিষ্যতৰ সুৰক্ষাৰ কথা চিন্তা কৰো তেতিয়াহলে আমাৰ যিখিনি উঠি অহা মহিলা আছে, প্ৰজন্ম আছে তেওঁলোকক আমি ৰাজনৈতিকভাৱেই হওক, সামাজিক ভাৱেই হওক আমি সকলোকে এই চিন্তাধাৰাৰ লগতেই হওক বা চৰকাৰখনে ভালেই কৰিছে নে বেয়াই কৰিছে এই গোটেই সামগ্ৰিকভাৱে জনাতো দৰকাৰ ৷

তাৰোপৰি যিসকলে এগৰাকী বোৱাৰী হৈ এখন নতুন সমাজত যায়, সেই বোৱাৰীগৰাকী স্বাভাৱিকতে কিছু ভয় আৰু শংকাত থাকে ৷ কিছুমান যদি প্ৰতিভাসম্পন্ন আছিল তেতিয়াহলে সেই ঘৰখনলৈ গৈ কাম কৰিম নকৰিম অলপমান ভয় - শংকাত থাকে ৷ সেইসকল মহিলা সকলে যাতে ওলাই আহি পুনৰ নিজকে প্ৰতিষ্ঠা কৰাৰ কাৰণেই হওক বা সমাজৰ কিবা এটা সেৱাৰ কাৰণে তেওঁলোকে সাহস পায়, প্ৰেৰণা পায় আৰু ৰাজনৈতিকভাৱেও সক্ৰিয় হয়, সামাজিকভাৱে সক্ৰিয় হয় তাৰ কাৰণে আমি অসম ভিত্তক এই 'ন বোৱাৰী সন্মিলন'খন অনুষ্ঠিত কৰাৰ বাবে সিদ্ধান্ত গ্ৰহণ কৰিছো ৷ সেইদৰে 'মূলা গাভৰু' শীৰ্ষক সমৰকলা আয়োজন, ডঃ মামনি ৰয়চম গোস্বামীৰ সোঁৱৰণত বক্তৃতা প্ৰতিযোগিতা আয়োজন কৰাৰ বাবেও প্ৰস্তাৱ গ্ৰহণ কৰে কায্যনিৰ্বাহক সভাই ৷ ইয়াৰ উপৰিও কায্যনিৰ্বাহক সভাত কিছুমান সাংগঠনিক বিষয়ৰ ওপৰতো আলোচনা কৰা হয় বুলি কয় ৷ সভাত ৰাজ্যিক বিজেপিৰ সভাপতি ভৱেশ কলিতাই নিজৰ বক্তব্যত কিছুমান সাংগঠনিক বিষয় সভাত ৰখা বুলি কৈ কয় যে মহিলাসকলক বুথলৈ গৈ মহিলাসকলৰ মাজত প্ৰধানমন্ত্ৰীৰ মন কী বাত শুনাৰ বাবে আহ্বান জনাইছে ৷ ইয়াৰ উপৰিও কেইবাটাও বিষয় ইয়াত আলোচনা হৈছে আৰু যিখিনি নীতি - নিৰ্দেশনা প্ৰস্তুত কৰি জিলা প্ৰতিনিধিসকলক দিয়া হ'ল আশা ৰাখিছো আগন্তুক তিনি মাহৰ যি কাৰ্যসূচী আছে সেয়া সুকলমে পাৰ কৰিব ৷ লগতে প্ৰশিক্ষণৰ কাৰ্যসূচীও লোৱা হৈছে আৰু মহিলা মৰ্চাই জিলাসমূহত এই প্ৰশিক্ষণ কাৰ্যসূচী অনুষ্ঠিত কৰিব ৷ সেইদৰে অহা ২০ দিনৰ ভিতৰত মহিলা মৰ্চাৰ জিলা কায্যনিৰ্বাহক সভাসমূহ জিলাই জিলাই অনুষ্ঠিত হ'ব বুলিও জানিব দিয়ে ৷ ইপিনে কায্যনিৰ্বাহক সভাত কিশোৰী আৰু মহিলাসকলক প্ৰেমৰ ক্ষেত্ৰত সজাগতা সৃষ্টিৰ বিষয়টোৰ লগতে বৰ্ধিত জনসংখ্যা নিয়ন্ত্ৰণৰ বিষয়টো গুৰুত্বসহকাৰে লৈ ৰাজনৈতিক প্ৰস্তাৱ হিচাপে আগবঢ়োৱা বুলি কয় ৷ সভানেত্ৰীগৰাকীয়ে কয় যে বৰ্তমান সমাজত দেখা গৈছে যে কিশোৰীসকল বা মহিলাসকলে কাকো ভালকৈ চিনি নোপোৱাকৈ আৰু ভালকৈ পৰিচয় নজনাকৈয়ে প্ৰেমত পৰিছে ৷ নাজানো এইটো হয়তো এটা ষড়যন্ত্ৰও হ'ব পাৰে ৷ সেয়ে আমি সজাগ কৰিব বিচাৰিছো মহিলাসকলক ৷ কাৰোবাক ভাল পোৱাৰ আগতে বা সেই মানুহজনৰ সৈতে সম্বন্ধ এটা গঢ়ি তোলাৰ আগতে সেই মানুহজন কোন হয়, কিয় বিখ্যাত, ক'ত ঘৰ, পৰিচয় কি এইবিলাক জনাৰ পৰিবেশ এটা আমি তৈয়াৰ কৰিব বিচাৰিছো ,যাতে তেওঁলোকে আগে ভাগে সচেতন হয় ৷ কাৰণ সদায় আমি ঘটনা এটা সংঘটিত হোৱাৰ পিছত চৰকাৰক অনুৰোধ জনায়, প্ৰশাসনক অনুৰোধ জনাও যে শাস্তি লাভ কৰক ৷ কিন্তু শাস্তি লাভ কৰাৰ আগতে আমি মহিলাসকল যাতে সজাগ হ'ব পাৰো, কিশোৰীসকল যাতে সজাগ হ'ব পাৰে এই কথাবিলাক আচলতে ঘৰখনত পিতৃ- মাতৃ বা সেই ঘৰখনত আলোচনা হ'ব পৰাকৈ আমি এটা পৰিৱেশ নিৰ্মাণ কৰিব লাগে ৷ ঘৰৰ ছোৱালীজনী ক'ত গৈ আছে, কলেজত গৈছে, কাৰ লগত সম্বন্ধ গঢ়ি উঠিছে, এইবোৰ দিশত সজাগ হ'ব লাগে ৷ এনেকুৱা বহুত বিবাহিতা মহিলা দেখিছো যে ছ'চিয়েল মিডিয়াত তেওঁলোকৰ কাৰোবাৰ লগত খুব বন্ধুত্ব হয়, তাৰ পিচত শাৰিৰীক হয়, সৰ্বস্ব হেৰুৱায় আৰু তাৰ পিছত তেওঁলোক থানাত যায় বা কেছ দিয়ে বা সেই মানুহজনেই নাইকিয়া হৈ যায় ৷ গতিকে এই ধৰণৰ পৰিৱেশ বিলাক যাতে নহওক তাৰ কাৰণে আমি এই সজাগতা সভাসমূহ আয়োজন কৰাৰ ব্যৱস্থা গ্ৰহণ কৰিছো ৷ আমি চৰকাৰেই সকলো কৰিব বুলি বহুত বেছি আশা কৰি তাৰ ওপৰত নিৰ্ভৰশীল নেথাকি সেই ধৰণৰ পৰিস্থিতি নহ'বৰ কাৰণে আগতিয়াকৈ সজাগতা সভাসমূহ অনুষ্ঠিত কৰাৰ বাবে মহিলা মৰ্চাই গুৰুত্বপূৰ্ণ ভূমিকা গ্ৰহণ কৰিব বুলিও কয় ৷ আনহাতে বৰ্ধিত জনসংখ্যা নিয়ন্ত্ৰণৰ ক্ষেত্ৰত মহিলা মৰ্চাৰ সভানেত্ৰী ডেকাই কয় যে এইক্ষেত্ৰত আমি আৰম্ভ কৰিবলৈ লৈছো যে মহিলাসকলই সজাগ হওক ৷ তাৰ কাৰণে সজাগতা সভাসমূহ যাতে ৰাজ্যৰ বিভিন্ন প্ৰান্তত অনুষ্ঠিত কৰিব পাৰো তাৰ কাৰণে ব্যৱস্থা গ্ৰহণ কৰা হ'ব ৷ কাৰণ এতিয়াও হাম দো হামাৰে দো নীতিত বহু সংখ্যক লোক অহা নাই ৷ কিছুমান এলেকাত এতিয়াও মহিলাসকল সন্তান জন্মদিয়া যন্ত্ৰ হিচাপে ব্যৱহাৰ হৈ আহিছে আৰু কৰবাত নহয় কৰবাত মহিলাসকলেও সেই ধৰণে নিজকে ব্যৱহাৰ কৰি আহিছে ৷ গতিকে তাৰ কাৰণে নিশ্চিতভাৱে আমি কিছু সজাগতা সভাৰ ব্যৱস্থা কৰিব লাগিব ৷ কাৰণ এগৰাকী সুস্থ মহিলাইহে এটা সুস্থ সন্তান জন্ম দিব পাৰিব ৷ যাক আমি ভৱিষ্যতৰ সম্পদ বুলি কও ৷ এতিয়াও কিছু এলেকাত, কিছু পৰিয়ালত এতিয়াও দহ - বাৰটা সন্তান আছে ৷ মই যদি আজি মোৰ ছোৱালীজনীক  ভালকৈ শিক্ষিত কৰিব নোৱাৰো, ভালকৈ যদি খুৱাব পিন্ধাব নোৱাৰো তেতিয়াহলে তেওঁ দেশৰ সম্পদ হৈ নেথাকে ৷ বৰং আপদলৈহে ৰূপান্তৰিত হয় ৷ গতিকে আমাৰ মহিলাসকলে এইক্ষেত্ৰত গুৰুত্বপূৰ্ণ ভূমিকা গ্ৰহণ কৰিব লাগিব ৷ মোৰ ঘৰৰ যি বাজেট আছে তাৰ দ্বাৰা মোৰ ল'ৰাটোক খুৱাব - পিন্ধাব পাৰিম নে নোৱাৰিম বা ছোৱালীজনীক খুবাব পিন্ধাব পাৰিম নে নোৱাৰিম,  ভাল শিক্ষানুষ্ঠানত পঢুৱাব পাৰিম নে নোৱাৰিম এই ধৰণৰ চিন্তা - চৰ্চা কৰি পৰিকল্পনাৰ ভিত্তিত যদি আমি এই ধৰণৰ ব্যৱস্থা কৰো তেতিয়াহলে মোৰ বোধেৰে বিশ্বতে যিহেতু বৰ্ধিত জনসংখ্যা এটা ডাঙৰ প্ৰত্যাহ্বানৰ সন্মুখীন হৈছে, সেইটো কিছু পৰিমাণেহলেও হ্ৰাস হ'ব ৷ গতিকে আমি অসমৰ যিবিলাক অঞ্চলত এটা পৰিয়ালত সন্তানৰ সংখ্যা বেছি সেই অঞ্চলসমূহ চিনাক্ত কৰি সেই অঞ্চলসমূহত সজাগতা সভাবোৰৰ বেছি ব্যৱস্থা ৰখা হ'ব ৷

ইয়াৰ জৰিয়তে নিশ্চয়কৈ মহিলাসকলৰ মাজত কিছুহলেও বিষয়টোৰ প্ৰতি চিন্তাৰ খোৰাক যোগাব আৰু মহিলাসকলক যিহেতু গৃহমন্ত্ৰী বুলি কোৱা হয় সেয়ে গৃহমন্ত্ৰীৰ যিটো ভূমিকা সেই ভূমিকা তেওঁ সঁচা অৰ্থত পৰিয়ালটোত পালন কৰিব বুলিও আশা প্ৰকাশ কৰে ৷ তেওঁ জনসংখ্যা নিয়ন্ত্ৰণৰ আইন প্ৰণয়ন কৰিব লাগে বুলি কৈ কয় যে কঠোৰ আইন তেতিয়াহে লাগে যেতিয়া ৰাইজে নামানে ৷ আমি বিচাৰিছো যে সকলোৱে নিজে সমাজখনৰ কাৰণে বিষয়টো উপলব্ধি কৰক ৷ কাৰণ সমাজখনত আজি যিমান হিংসা, বিদ্ৰেহ হৈছে,  হাই - কাজিয়াৰ সৃষ্টি হৈছে কৰবাত নহয় কৰবাত জনসংখ্যা বৃদ্ধিৰ কাৰণে হৈছে ৷ কাৰণ এই সমস্যাটো হ'ল মানৱ সৃষ্ট সমস্যা ৷ সেয়ে মানৱে সৃষ্টি কৰা সমস্যাবিলাক আমি মানৱেই সমাধান কৰিব লাগিব ৷ চৰকাৰে জনসংখ্যা নিয়ন্ত্ৰণৰ বাবে কঠোৰ আইন আনক বাব নানক সেয়া চৰকাৰৰ কথা ৷ কিন্তু আমি ভাবিছো তাৰ পূৰ্বে আমাৰ মহিলাসকল সজাগ- সচেতন হওক আৰু এই বিষয়তহে মহিলা মৰ্চাই কাম কৰিব বুলি কয় ৷ কাৰ্যনিৰ্বাহক সভাৰ আৰম্ভণিতে জিলা মহিলা মৰ্চাৰ সভানেত্ৰীয়ে আদৰণি ভাষণ ৰাখে ৷ সভাত প্ৰস্তাৱিক ভাষণ আগবঢ়ায় সভানেত্ৰী আঙুৰলতা ডেকাই ৷ ৰাজনৈতিক প্ৰস্তাৱ পাঠ কৰে সম্পাদিকা মধুস্মিতা ডেকা হাজৰিকাই ৷ সভাত বঙাইগাঁও জিলা বিজেপিৰ সভানেত্ৰী হিমানী অধিকাৰীও উপস্থিত থাকি বক্তব্য ৰাখে ৷ উল্লেখ্য যে শনিবাৰৰ পৰা আৰম্ভ হোৱা মহিলা মৰ্চাৰ বঙাইগাঁও ৰাজ্যিক কায্যনিৰ্বাহক সভাত ৰাজ্যখনৰ বিভিন্ন জিলাৰ পৰা জিলা প্ৰতিনিধিনিসকল উপস্থিত হৈছিল ৷ লগতে ৰাজ্যিক সমিতিৰ বিষয়ববীয়া আদি ৷🔯